droicte, & ſincere. N’apporter haine, ny paſsions
à ce iugemẽt : ains cerchant la verité, deſirer puſtoſt
trouuer l’innocence, que la coulpe. La coulpe
eſtant verifiee, auoir compaſsion du malheur
auquel le coulpable eſt cheu : Mais auoir vne balance,
& meſure iuſte à ceſte pitié, qui eſt, comme
la haine particuliere, ne doit iamais nuire au
public, aufsi la particuliere amitié, ou commiſeration,
ne doit iamais faire contrepoids, à la pitié
que le prince doit auoir, de la ruine publique, &
generale de ſon Royaume : & encores moins, au
zele qu’il doit à la conſeruation, & amplification
du regne de Dieu.
Le Prince qui refuſe la iuſtice à vn ſien ſuiect,
eſt coulpable deuant Dieu, à plus forte raiſon celuy
qui la refuſe à tous ſes ſuiets d’vn coup, & notamment
à ceux deſquels on ſcait que leur mort
eſtoit iuree par ceſte conſpiration : leſquels (à ce
que i’ay entendu) ſont des plus illuſtres de ſon
Royaume. Et qui par les fideles ſeruices qu’ils
ont fait à la royne d’Angleterre, meritent qu’elle
leur octroye, ce qu’elle doit au moindre de ſes ſuiets,
qui eſt la iuſtice des machinations qu’on fait
contre leurs vies.
Il eſt certain qu’il n’y a fidele ſeruiteur de la
royne d’Angleterre qui n’aye fait, & deu faire tous
les offices qu’il a peu, de deſcouurir, accuſer, & cõdamner
(chacun ſelon ſa vocation & qualité) vne
ſi malheureuſe conſpiration, & qui par là ne ſoit
expoſé, à la haine de tous les conſpirateurs, & de
leurs complices : & plus ils y auront fait leur deuoir,
plus ils en ſeront hays de ceux qui ſont les
