tres gentils-hommes, & ſoldats Anglois, & François,
dreſſa vne petite armee, d’enuiron cinquãte
Nauires petits, & grans : entre leſquels, la Royne
fournit vn ſien nauire, nommé la Prime-roſe, du
port de quatre cens tonneaux : & euſt baillé auſsi
le nauire Biſcain de meſter Hacquin, n’euſt eſté
que meſter Olſtat, Vice-amiral Anglois, auoit enuiron
ce temps-là, deſualizé ſur le nauire Biſcain,
plus de vingt nauires François, & Vvallons, qui
eſtoyẽt és haures, & en la coſte d’Angleterre, armez,
& preſts à accõpagner le cõte de Mõgomeri.
Le pol. Et cõment, bon Dieu ! Vn ſeul nauire, pouuoit-il
bien deſualiſer vingt nauires armez ?
L’hiſt. Fort aiſément, ainſi comme il les trouuoit
dans les haures, où ils ne ſe doutoyent de rien, cõme
n’eſtans en rien coulpables, oyans que c’eſtoit
par le commandement de l’Amiral d’Angleterre
le myllord de Clynton, les poures gens n’oſoyent
point reſiſter.
Le p. Voire, mais, quelle occaſiõ auoit le myllord
de Clynton, de cõmander que l’on fiſt vn tel vol ?
L’hi.Il n’ẽ auoit du tout point : mais voicy ſon pretexte.
La Rovne d’Angleterre, ne ſe contentant
point d’eſtre liguee auec le plus meſchãt Tyrã de
la terre, voulut auſsi eſtre ſa cõmere, & preſenter
au Bapteſme la fille de ce deſloyal : pource faire, elle
luy enuoya en ambaſſade le myllord de Vvenceſter,
pour faire l’office de la part de la Royne.
Le pol. Ie m’esbahys, cõment ceſt que le myllord
de Vvenceſter, ne ſupplia la Royne de l’excuſer,
veu qu’il ne pouuoit honeſtemẽt & en bonne cõſcience,
ie ne dis pas preſenter l’engeãce du Tyrã,
