de Naſſau, frere du prince d’Orenge, qui depuis
la paix derniere s’eſtoit tenu à la Rochelle, auec
lequel il traicta de diuers moyens & deſſeins, qu’il
deſiroit exploiter contre le roy d’Eſpagne pour
ſe venger des torts qu’il luy auoit faits : & l’entretenant
auec douces careſſes, reſolut auec luy vne
entrepriſe de treſgrande conſequence, qui s’eſt du
depuis executee en partie ſur le pays bas, par
ledict comte Ludouic, le ſeigneur de la Noue, &
pluſieurs autres François : au ſecours deſquels eſtans
aſsiegez dans Mons, le Roy enuoya le ſeigneur
de Gẽlis, auec quatre mille ſoldats de pied
ou de cheual : Si fut auſsi ladicte menee du Roy
auec le comte Ludouic, occaſion & cauſe que le
prince d’Orenge auec vne puiſſante armee entra
dans le pays bas, qui ſe reuolta preſque tout du
roy d’Eſpagne, & print la Hollande (qu’il tient
encores maintenant) auec la plus grande partie de
Zelande, en danger de ne la quitter iamais.
L’Admiral, perſuade & conduit par le
mareſchal de Coſſé, & pour ſatisfaire à la volonté du
Roy, vint trouuer à Bloys ſa maieſté : qui pour oſter
la crainte que l’Amiral auoit de la maiſon de
Guyſe, luy enuoya des lettres de congé, à mener
cinquante gentils-hommes auec luy armez, pour
ſa ſeureté, iuſques à la cour : où eſtant arriué, le
Roy, & la Royne ſa mere, le receurent de toute la
plus courtoiſe façõ qu’il leur fut poſsible : le Roy
le voulut ouyr ſouuent en conſeil ſecret & à part,
és choſes de plus grande importance, monſtrant
de ſe fier en luy de ſa vie & de ſon Royaume, cõme
il euſt fait en ſon pere propre.
