E brocunt les cheuaus e ferunt ſei
Ni at tan fort eſcut toz n̄ pezoi
Des albres ſunt falſat li catre plei
Ambe dui ſe deſrocent en un caumei
E ſi beges mort co plaz au rei
Peire en aiac tals cinc anz en un leu quei
Ne montet en cheual niuia lei
Quant ueit caer gauters peirun ſon fil
E ſau cor li peſet n̄ mereuil
Fert begun contre terre ſoz len bonil
Que ſa lance len ferre trues el cāmil
Agenes uent poignant fouchers e il
E uunt ferir gauter am li dunzil
Tot li trocent denant leſcut uermil
E crabentet lo mort aitant ſotil
Canc pois non remudet neſ kebezil
Par eiqui ſunt paſſat ſet cent gerrer
Caſat de mont rabei e eſtager
Trobunt nafrat peirun e mort gauter
Lor ſeinor natural gonfanoner
De la preſſe lo trait tuit triſt e ner
Pois tornent en la preſſe irat e fer
Jſte maiſnade a mort mont de foucer
Mais pois les unt comprat char a derer
Quanc n̄ eſtortrent uint ſain ne enter
En folcon out uaſal ſaiue e oneſte
E coinut la bataille e cauſiſt leſtre
E laiſa la de iorz ſobre ſeneſtre
E cadele tros lai o reis poeſte
E corent lo ferir ſobre laz deſtre
Tal cruis funt e tau ſon come tēpeſte
Lai uiraz tan donzel de franqe geſte
Partir de ſon cheual e bu de teſte
Cuns n̄ receit conſel de man de preſtre
Del ſeinoril barnat qui mort la reſte
Sunt deſertes laſ ſaules quan uen a feſte
Aienris uen cridant uauluc uauluc
Cuil fert de ſa lance an pois nos muc
Clame girart traicos e mal oſtruc
Mare uiſtes la mort teuri fauc
Folco lo uait ferir quan lo coinuc
Tot li torquet loberc lo poiz el buc
E no ſe tenc tan fort mort nel trebuc
Laiſſaz eſtar lo tun girart lo duc
Jſta bataille fun a un diſſade
En ſiual lon ueiane en une prade
Lai uiraz tan donzel gole baade
Muirir e trabellar ſor lerbe lade
Tant lai eſpant del ſanc ꝑ la rozade
Sanglente en uait ueiane une legade
Jſta bataille fun un ior deſtat
E duret tros la nuit tan ſunt irat
