E de cai ſobre deſtre noſtre teſc
Atant folche lai uen ꝑ lo calmeſc
E deſcendet a pie del brun moreſc
Trait girart a conſel crient ce foleſc
E demandet girart don que uol faire
Meſ felonſ anemiſ de lainz traire
Tot ior ſolum de gerre bruir ebaire
Hui ſunt de lor orguel chaut li caire
Ere garde catei maiunt repaire
Car deuſ eſt uertaders e dreiz iuiaire
E at uerſ nos eſtat eſ pres uengaire
Li reis eſt noſtre ſendre e mi compaire
El reine nos eſt en lui de maire
E ſi de li te menbre dreiz eſt que paire
E girarz de boſon preſ a retraire
Quanc ne fu ne non ert tauſ gerreare
E uoſ bonſ maiſ que trop eſ predicaire
Que non mourei anuit por ca dent traire
E le matin ferai tot ton uiaire
E tot quant ia uourat n͞r͞e emperaire
Laſſe li diſt bertranz ſon talent faire
Molt li ſat bon al cor car ſen eſclaire
Le matin diſt girarz ſerunt trames
Eu nai un diſt bertranz ugon de bles
Mais ne cuit en nul leuc mellor frances
E conſellers au rei li plus cortes
Denant lo fai uenir e el si fes
Segner uge diſt folche ſeiaz nos mes
E donrai uos ſempreres iceſt mores
Diiaz al rei por deu que trop nel pes
Toz li rendrem leſ ſeus ſe morſ nō es
E leſ autreſ aurez por caſcun tres
E de tot quā quaue uerſ lui meſpres
Noſ metre ſe lui plaz en ſas marces
E met i de ta part cel ki melz ſes
Huge lai eſ annaz u fun li reis
E contet li les moz per aiqui es
E ſon trop ganz orguelz que ta genz fes
Quiſ annet aſaillir en fol en ſes
Per quei fu comenchaz li mal deſres
Anc li conte ne uirent ren tant lor pes
Eu dic uos de ma part ſi maiut fes
Cons qui rei rent doit bien trobar marces
Coment queu ſui aſſiz e face plait
Ja puiſ iheſus de mei merci nen ait
Ere cuide girarz per co meſmait
Non me gardaue ginſ de ceſt agait
Altre engien li couent a que maſait
E huge renunzet ce che eſ fait