Mais fui de ci et va ta voie.
Va aprendre, tu feras bien,
Que, contre moi, ne sez-tu rien.
Beax seignor, vos qui estes ci,
Qui nos parole avez oï,
Se j’ai auques mielz di de li,
A toz ge vos requier et pri
Que le metez fors de ceanz,
Qui bien pert que c’est .i. noienz.
CH’EST DU HONTEUS MENESTEREL.
Selonc le siècle ki bestourne
Me convient-il que je m’atourne
Se g’i voel vivre ne durer ;
Mais je ne porroie endurer
Ce que je voi k’autres endure ;
Car on troeuve le gent trop dure,
Peu courtoise et du leur tenans ;
Et c’est cose mal avenans
A ménesterel ki est honteus.
N’on ne puet entrer ès osteus
Sans buscier u sacier le clenque.
Jà de main droite ne d’esclenque
Ne puisse faire tel mescief
Ke j’en face broncier le cief
Le segneur devant se maison ;
S’il est haitié de raison
Et monstre samlant caritaule
Et fait contenance de taule
Tele que courtois set monstrer,
On voit le courtoisie outrer :
Luès que ménestreus s’i embat
Toute le boine cière abat.
N’est bienveigniés ne respondus ;
Ménestreus est bien confondus
Cui vivre estuet à tel dangier.
