Lors commencent d’el à parler ;
Mais je demain trop longue lime,
Je vois trop alongant me rime,
Car on n’y puet nul bien puichier :
Or voel me bouce réeinchier.
Du plus vaillant dirai le some
Qui fust d’illande dusc’à Rome,
Del bon conte Tibaut de Blois,
Del preu, de l’ large, del cortois,
Que gré m’en sara tous li pire
Quant tous les biens m’en orra dire ;
Mais tant dira, comment qu’il aut,
Que riens de l’ mont en lui ne faut
Que nus bons princes ait éu
C’on ait el siècle connéu.
Mult est li quens Tibaus preudon :
Bien a ataint dusques en son ;
Il vient sovent ù gent s’assemble ;
Mais cuidiés-vos que il s’en emble ?
A l’endemain de l’ parlement
S’en fuient tout communalment
A la jornée, je vous di,
Mais il atent jusc’a miédi
Con s’il estoit lor cambrelens.
Lors fait aporter ses berlens
Et les escuiers[1] por juer
L’avoir dont se velt descombrer ;
Car ne li vont pas anoiant,
U il le sien vait estivant,
Qu’il done tous jours sans prumetre,
Ne velt en autre trésor metre,
Et tous li mons prise se vie.
Mais une riens, çou est envie,
Qui tait le bien, ù que il soit,
Si fait mult bien que faire doit,
Car tous jors mesdist del plus haut
Qui de le cose que mix vaut.
Jà ne mesdira de nului
S’ el’ preu ne l’ voit : si het cestui ;
Mais mes cuers l’aime mult et prise.
Por lui ai-jou ceste œvre emprise…
- ↑ Échecs.
