Si comperrons ceste venue
Se n’en vient à desconvenue.
Li Cordelier, li Préêcheur
Qui là estoient peschéeur,
Et mains autres religieus
Des quelz il faisoient leur diex,
Et il en faisoient déesses,
Laiens chantoient-il leurs messes
A orgue, à chant et à deschant,
Dont il aloient esléeçant.
Maintes gens qui les escoutoient :
De leurs vois seraines sembloient[1].
Or est sous le banc lor viole,
S’autrement Diex ne les citole,
Lor ordre faudra pou-à-pou :
De la paroisse sont saint Pou
L’apostre de non et de fait.
Je ne sai qui ce leur a fait,
Mais il en sont en grant torment,
Mais il se plaignent moult forment :
Veus en font as sains et as saintes,
Et à saint François lor complaintes,
Et à saint Dominique envoient :
Moult leur prient qu’il les r’avoient ;
Et saint Bernart aussi reclaimment,
Car son ordre et ses Frères aimment,
Et ausinc sainte Bertine,
Car c’est leur prochaine voisine,
Nostre-Dame au Carme après
Retiennent-il souvent de prez.
Bon fust que miracle en féissent
Si que dedens les reméissent
En leur juste possession.
Por ce sont en affliccion
Jor et nuit ; que Diex les sequeure !
Car le secours moult leur demeure.
Envoié ont, c’est vérité,
Au pape qu’il ait d’eulz pité,
Et je croi bien que tant feront
Por les Frères qu’il renterront
- ↑ Il faut traduire ce vers ainsi : Leur voix ressemblait à celle des sirènes
