fice, greffier de la dicte ville et comté de Brioude, de messieurs les Esleus por le roy en l’eslection de la dicte ville, messieurs, les commis d’icelle et plusieurs autres habitans de toutes les paroisses de ladicte ville et bourgz ; tant hommes, femmes que petitz enffans : reverend Père frère Françoys Humblot, provincial des Mynymes de la province de Lyon, Père Joseph Joffre Janon, et Père Pierre Tillot, collègues, du dict ordre, on (sic) esté conduictz en procession, portens une croix de boix ; partons de la dicte esglize St Julhen-de-Brioude les sieurs comptes, doyen, chanoynes prébandiers, dymy prébandiers ayons le surplys en l’esglize monsieur St Feryol près Brioude. Où estans, le révérend pere, frère Humblot et ses collègues on dict et remonstré à messieurs les comptes, en l’acistance que dict est cy-dessus, comme il leur avoyt pleu, dès hier, fonder ung couvent de leur ordre en la dicte esglize St Ferryol et icelluy doubler (sic), suyvant le contract de fondation que feust passé, reçeu par les noteyres soubssignés ; que a esté illec expédié et représenté :
Suivant lequel ilz on suplié et requis les dictz sieurs comptes de les voloyr mettre en la possession et saisine de la dicte esglize, ensainte et porpris d’icelle, que sont balhés par le dict contract, soubz le bon plaisir de Sa Saincteté.
Satisfaisans à laquelle réquisition, de la part des dicts sieurs comptes, noble et scientificque personne, messire Jehan de Ludesse, compte et doyen de la dicte esglize, a prins, en la présence et du consentement de tous les seigneurs comptes, chanoynes ebdomadiers, dymy prébandiers, choriers, et de tous autres adcistans et accompagnans la dicte procession, révérend Père frère François Humblot, provincial du dict ordre, par la main, et soubz le bon plaisir de la dicte Saincteté, auquel sieur frère Humblot il a faict fere ouverture du verroul de la porte de l’esglize du dict St Ferryol. Et apprès avec icelluy, est entré dans la dicte esglize ; prins tous deux d’eau bénite ; et estans mis à genoux et faict leur oraison. Et après se sont présentés audevant du grand haultel quilz on baizé et en dessandans… on sonné les cloches du clocher et autres de la dicte esglize.
