accouru auec plusieurs autres habitans de ladite ville, il vit, lors dudit bruslement, que aucuns jettoient de ladite chambre des papiers dans le cimetière qui est aboutissant et joignant lesdits cloistres et chambre des comtes ; partye desquels papiers estoient a demy bruslez. Dit de plus qu’il ouyt dire que, après que ladite chambre fust brûlée, aucuns enfans de ladite ville y auoient trouué, parmy le marrain, d’or et d’argent fondu, qu’ils portèrent chez l’orpheure appelle Le Borgne, argentier. Et a dit autre chose ne sçauoir, si ce n’est ce que dessus contenir vérité, et a signé. Et dudit incendie et bruslement y auoir en tout soixante ans, signé Rodier, auec parraphe. Et, a costé, taxé audit déposant XII sols.
Honorable homme Annet Dalmas, apothicaire de ladite ville, aagé d’enuiron soixante dix ans, autre tesmoing produit, juré et receu en l’instance et contre que dessus a dit cognoistre les dites partyes comme leurs habitans, et n’estre leur parent n’y allié. A dit de plus, sur les articles portez par ladite requeste, qu’il peut auoir cinquante quatre ou cinq ans, ou enuiron, qu’il vist brusler la chambre des comtes appartenant à messieurs du Chapitre, située dans les cloistres de l’église monsieur saint Julien de Brioude, qu’il vit accourir plusieurs habitans de ladite ville pour esteindre ledit feu et empescher qu’il ne bruslat les autres maisons circonuoisines, et que pour lors ceux qui vouloient esteindre ledit feu crioient à haute voix et disoient qu’il s’estoit bruslé grand nombre de papiers, mais ne sçait quels papiers c’estoient. Et ce que dessus dit sçauoir, pour auoir esté présent et voyant, et par ainsin ce que dessus estre véritable. Et a signé, Dalmas, auec parraphe. Et a costé, taxé XV sols.
Pierre Chassaing, habitant de ladite ville de Brioude, aagé d’entour soixante quatre ans, autre tesmoing produit, juré, receu, et examiné, par le serment qu’il a fait de dire vérité, a dit bien connoistre lesdites partyes, comme leur subiect et habitant, et n’estre leur parent ne allié. A dit, de plus, sur le contenu en ladite requeste, qu’il peut auoir cinquante cinq ans, ou enuiron, que la chambre appellée des comtes, appartenant auxdits sieurs
