scend et dit à Corsina (au travers d’une porte des prisons qui est en ceste muraille) qu’il avoit tenu la corde trop longue, et qu’il la retirast de deux ou trois eschelons, ce que fit Corsina. Mais, sur ces entre-faites, le vallet retourne du vin, ne trouve point le prisonnier en sa chambre, advertit le geolier et ses serviteurs, qui cherchent de tous costez, voyent la chambre du geolier ouverte, les habits de Fava, la corde qui pendoit par la fenestre du cabinet en la court, descendent à la court, et trouvent Fava sur le point de remonter à l’eschelle et se sauver, l’arrestent et le renferment, vont voir sur le quay, à l’endroit des prisons, qui y estoit, r’encontrent un jeune homme, l’espée à la main, qui s’enfuit aussi tost. Ils retournent aux prisons, et payent le pauvre prisonnier de leurs peines. Les geoliers sont ouïs sur ce bris de prisons, Fava interrogé ; on luy represente la corde et l’eschelle qu’il recognoist, et respond du fait comme il a esté cy devant deduit ; et toutes fois il dit qu’il ne sçait pas si ce fust Corsina qui luy jetta l’eschelle ou son serviteur, d’autant qu’il ne le veid et ne l’entendit pas parler. Mais il y a quelque apparence que tout ce qu’il a dit de Corsina ne soit qu’une invention et un pretexte pour favoriser et couvrir Giovan Pietro Oliva, son beau frère, ou quelque autre, du ministère et de l’entremise duquel il s’est servi depuis sa prison.
Antonio Bertoloni estoit arrivé à Paris avec lettre de faveur de la republique, avoit salué monsieur l’ambassadeur de Venise, avoit esté presenté au roi par monsieur de Fresne, et sa Majesté luy avoit fait cet honneur que d’entendre entièrement sa plainte,
