de leur fuyte et route, sans avoir nulle discretion du lieu où ilz se doivent arrester, et sont pour le jourd’huy en telle confusion, que ne se sentans seurement en leur pays, se delibèrent se retirer en Turquie, qui est le lieu où leur devotion est du tout adonnée, pour lesquelz ilz ont tant deceuz de chrestiens, parce que le schisme qui y est apposé, et le scandale par eux y advenu, dont le Roy, le peuple et les princes sont en telle dissention, n’est du commencement jusques à la fin provenu de leur malefice, dont pour se sauver passent les mers pour s’en venir ès sus dictz lieux de Barbarie, pource que c’est un pays propre à desniaiser et là où il y a bien à prendre, et sans rendre compte sourdement desrober, tromper et decevoir les plus fins et habiles, et à faire sauts et gambades.
Ilz ont par leur ruse et cautelle
Deceu l’ame de maint fidelle,
Pippé le Roy, trompé les princes
Et pillé toutes les provinces.
