trop forz et de murs et de siege. Lors, fist sa proiere à Nostre Seigneur et dist ensi : « Jesu Criz, sire, pour la cui foi essaucier je sui venuz en ces parties pour destruire gent sarrazine, done-moi que je pragne ceste cité, à la gloire et à la loenge de ton non ; et tu, mesires saint Jaques, se ce est veritez que tu t’apareusses à moi, proie à Nostre Seigneur que il me laist ceste cité prendre. » Toute maintenant que il ot ce dit, li mur de la cité froissierent et fondirent jusques en terre. Lors entrerent enz François ; les Sarrazins qui baptesme vorrent recevoir garderent à vie et les autres, qui en lor mescreandise demorerent, occistrent. Quant la novele de ce miracle fu par le païs espandue, li prince sarrazin venoient au devant à Karlemaine partout là où il aloit. Devant lui s’umilioient[1], li citez li rendoient, et li autre qui pas jusques à li ne venoient li enveoient treüz ; si fist en tel maniere toute la terre d’Espagne tributaire. Moult se merveilloient Sarrazins de ce que il veoient la gent de France si bele, et si fort, et si fiere, et si bien apareillié d’armes et de chevaus et d’autre hernois. Lor armes metoient jus et les recevoient honorablement et paisiblement.
En tel maniere trespassa Karlemaines et ses oz tote Gascogne, Navarre et Espagne jusques en Galice, en prenant citez et chastiaus. la sepouture monseigneur saint Jaque visita devotement, puis passa outre jusques au perron, sanz contredit[2]. Sa lance ficha en la mer et quant il vit que il ne porroit outre passer,
- ↑ « Et s’enclinoient humblement », ajoute le royal ms. du Brit. Mus. 16 G VI, fol. 166.
- ↑ « Inde visitato sarcophago beati Jacobi venit ad petronum » (Chronique de Turpin). Le perron serait aujourd’hui, d’après Gaston paris (De Pseudo Turpino, p. 20. Cf. Joseph Bédier, les Légendes épiques, t. III, p. 46), la ville d’El-Padron, Espagne, province de la Corogne (l’Iria Flavia des Romains), où la barque portant le corps de saint Jacques aurait abordé.
