Dieu et trine te preeche, car il est i et trines. Toutes les iii persones sont ensemble perdurables et unies ; tiex com li Peres est, tiex est li Fiuz et tiex li Sainz Esperiz. En persones est proprietez, en essence unitez, en majesté est aourée equalitez. Un seul Dieu et trine aourent li ange ou ciel. Abraham en vit iii et si en aoura un seul. »
« Ice me monstre », dist li geanz, « coment iii choses sont i. »
« Je le te monstrerai », dist Rolant, « par l’example d’aucunes creatures. Il a iii choses en la harpe, l’arc, les cordes et les mains, et si est une seule harpe. Ausi a-il iii choses en Dieu, le Pere, le Fil et le Saint Esperit, et si est uns seus Diex. Et ausi comme tu voiz en l’amande iii choses, l’escorce, la coquille et le nouel[1], et si est une seule amande. Ausi sont iii persones en Dieu, et si est uns seus Diex. Ou soleil a iii choses, blanchor, resplendissor et chalor, et si est une meisme chose. En la roue de la charete est li moieus, li rai et les jantes, et si est une seule roe. En toi meismes a iii choses, li cors, li membre et l’âme, et si es uns seus hons. Tout ausi est en Dieu, et unitez et trinitez. »
« Or, entent-je », dist Fernaguz, « coment Diex est trines et uns ; mais je n’entent pas coment il engendra le Fil, si com tu diz. »
« Croiz-tu », dist Rolant, « que Diex feist Adam le premier home ? » « Je le croi » dist li geanz.
« Ausinques », dist Rolant, « come Adans, qui de nului ne fu engendrez, engendra fiuz, ausi Diex li peres, qui de nului ne fu engendrez, engendra le Fil de
- ↑ Le nouel, le noyau.
