honte en pourroit avoir ; si respondi en celle maniere ; c’est à savoir qu’il en respondroit et feroit bon conte et loyal. Et lors acertes le conte de Valoys respondant li dist ainsi : « Rendez le donc tout maintenant. » Lors li respondi Engorran et dist ainsi : « Sire, volentiers ; je vous en ay baillié la plus grant partie, et le remanant j’ay mis en paiement pour les debtes de monseigneur le roy vostre frere. »
Et quant Charles de Valoys oy le conte Engorran, et que premierement il li faisoit honte, lors fu moult corrouciez et iriez ; si li dist : « Certes, de ce mentez vous Engorran. » Et lors Engorran respondant dist : « Par Dieu sire, mais vous mentez. » Adonc Charles conte de Valois, ce entendu, si sailli d’autre part et le cuida prendre. Mais pluseurs firent cesti Engorran de ses iex destournier et desparoir, car s’il le peust avoir tenu en celle heure, il l’eust occis et fait occirre par les siens, ou mourir de cruel mort. Et lors, pour ceste devant dicte cause et pour autres fais aucuns, pou de jours trespassez, fu Engorran de Marigni pris et menez en prison au Louvre si comme devant.
Et après ce, le conte de Valoys fist à savoir et manda à touz, tant povres comme riches, ausquiex Engorran de Marigni auroit forfait, venissent à la court le roy et feissent leurs complaintes, et que de li il auroient très bon droit. Adonc Engorran de Marigni ou Louvre emprisonné, Charles conte de Valoys en yce point non reposant, vint au roy de Navarre son neveu Loys et li dist : « Sire que avez fait ? Adecertes vous avez mis ce larron Engerran en sa maison, en la tour du Louvre emprisonné, car il est chastelain du Louvre ; et pour ce m’est il avis que c’est desconvenable chose li estre
