sez deniers et leur administreroit les poisons, et il distrent que il ne le pourroient faire par eulz, car se les Crestiens les veoient aprouchier de leurs puis, les aroient tantost souppeçonneus. Mais par les mesiaux qui estoient en vilté, pourroit estre fait, et ainsi, par dons et par promesses les Juis les enclinoient à ce. Et pluseurs renioient la foy et metoient le corps de Jhesu Crist en poisons, par quoy moult de mesiaux et de Juis furent ars. Et fu ordené de par le roy que ceulz qui seroient coupables fussent ars, et les autres mesiaux fussent enclos en maladeries sanz jamais issir ; et les Juis fussent abnis du royaume. Mais depuis y sont il demourez pour une grant somme d’argent.
En cest an meismes, avint-il i cas à Vittri[1] qui estoit tel que comme xl Juis fussent emprisonnez pour la cause devant dicte des mesiaux, et il sentissent que briefment les convendroit mourir, si commencierent à traitier entre eulz en telle maniere que l’un d’eulz tueroit touz les autres, afin que il ne fussent mis à mort par la main des incirconsis. Et lors fu ordené et acordé de la volenté de touz, que un qui estoit ancien et de bonne vie en leur loy les mettroit touz à mort, lequel ne s’i voult acorder s’il n’avoit avec li jeune homme. Et donc ces ii les tuerent touz, et ne demoura que eulz ii. Et lors commença une question entre eulz ii, lequel metroit l’autre à mort. Toutefois l’ancien fist tant par devers le jeune, que il le mist à mort ; et ainsi demoura le jeune tout seul et prist l’or et l’argent de ceulz qui estoient mors, et commença à penser comment il pourroit eschaper de celle tour où il estoit. Si
- ↑ Vitry-le-François, Marne, ch.-l. d’arr.
