virent oultre, si tournerent leurs banieres et leur coururent sus par très grant courage ; et commença ilec la bataille par telle maniere que en la fin les Flamens furent desconfiz. Et le conte d’Armignac s’en ala vers ceulz d’Ypre, et tantost qu’il le virent venir vers eulz, si s’enfuirent, si que on ne sceust onques bonnement quel chemin il tindrent. Et lors le conte se retrait vers ceulz qui chaçoient les fuianz ; et en celle fuite y ot moult grant quantité des Flamens et de ceulz de la partie Robert d’Artois mors. Endementres que les Artisiens et le conte d’Armignac se combatoient et chaçoient les Flamens vers Arques, messire Robert d’Artois aveques toute sa bataille vit le duc de Bourgoigne ester devant la maladerie. Si fist mettre ses engins arrieres, et vint atout i grant hui[1] vers la ville de Saint Omer. Quant les gens au duc le virent venir, si se trairent hors du chemin par devers les champs ; et monseigneur Robert d’Artois les cuida avoir seurpris enmi la rue des forbours, car les gens d’armes ne se peussent là avoir ayde contre les gens de pié, mais il failli à s’entente. Tantost il se retrait a toute sa bataille vers la porte de la ville de Saint Omer, et derechief cuida encore ledit messire Robert d’Artois avoir seurpris ledit duc de Bourgoigne. Mès ainsi comme Dieu le voult, ceulz qui estoient en la porte recognurent leurs banieres, tantost commencierent à traire et à getter vers eulz ; mais l’entrée de la ville fu si apressiée de genl que nul n’i pot entrer ne issir de ceulz qui s’enfuioient vers la ville.
Quant monseigneur Robert d’Artois et ses gens
- ↑ Atout I grant hui, avec un grand bruit. La Chronographia, t. II, p. 132, dit : « cum maxima cohorte ».
