quel avoit escript à la court de Rome et audit roy de Navarre de li, fut ledit frere Gille Rigaut subrogué au gouvernement de laditte eglise, et en laditte court de Rome, avant qu’il partist, fu beneï ou consacré.
Un pou après la beneïçon de Gille Rigaut en abbé de Saint Denis en France, Phelippe roy de Navarre prist congié au pape et empetra, tant pour lui comme pour ceulz qui estoient aveques lui, du pape plaine indulgence de paine et de courpe, et se mist en chemin pour aler en l’ayde du roy de Castelle contre les Sarrazins. Ycesti roy de Castelle se combatoit continuement contre les Sarrazins et avoit guerre continuement contre eulz, et especiaument pour le temps, il avoit moult à faire contre le roy de Garnate et contre le roy de Belle-Marine, car il avoit assegié et mis siége contre une très noble et très forte cité, laquelle est appellée Algesire, et est divisiée en ii parties, et court une riviere parmi, et y a i pont par lequel l’en va d’une partie à l’autre ; dont l’une partie est appellée Algesire la neuve, et l’autre Algesire la vielle. A ce siége vint le roy de Navarre ou moys d’aoust, et fu receu du roy de Castelle a très grant joie et grant honneur. Et jasoit ce que ledit roy de Navarre eust moult grant desir de soy combatre contre les Sarrazins, toutes voies assez tost après qu’il fu arrivé au devant dit siége, il li prist une forte passion que l’en appelle flux de ventre, et se parti de l’ost du roy de Castelle et de l’ost des Sarrazins environ III liues loing[1], et ylec mourut comme
- ↑ Philippe d’Évreux, roi de Navarre, qui avait été au secours du roi de Castille, Alphonse XI, contre les Maures, tomba malade au siège d’Algésiras et mourut à Xérès le 16 ou le 26 septembre 1343 (Art de vérifier les dates, in-fol., t. I, p. 755).
