les murs et assaudrez le plus fort que vous pourrez », et ainsi fu fait. Adonques pristrent les cinq Genevois leur martiaux et mistrent leurs escuz sus leurs testes, et s’en alerent aus murs, et les autres donnoient fort assaut à ceuls qui estoient sus les murs de la ville. Endementres qu’ilz assailloient par tele maniere, les devant diz v Genevois osterent v pierres des murs et les caverent par tele maniere que ilz furent à couvert par dedenz les murs, et ne leur povoit-on mal faire des carniaux. Ilz estoient loing l’un de l’autre environ x piez. Si caverent les murs par tele maniere, que dedenz heure de midy, il cheut des murs environ l piez en longueur, et tantost y entra i Genevois assez petit de corps, et ot les florins que monseigneur de Craon tenoit. Et après lui entrerent, tantost depuis que le mur fu cheu, communelment touz ceus de l’ost quiconques y vouloit entrer indifferenment, car il avoit esté ordené des capitaines par avant, que tous les biens de la ville seroient communs et abandonnez à tous ceuls de l’ost qui les pourroient gaaignier. Ilz tuerent premierement, sanz difference, les hommes et les femmes qui estoient en la ville habitans, de quelconque aage qu’ilz feussent, et mesmement les enfans qui alaictoient.
Quant ilz orent ainsi mis à mort tous ceuls qu’ilz avoient trouvez en la ville, si commencierent à giter au chastel ouquel s’estoient retraiz environ cc et xl Anglois. Mais quant ilz virent la hardiesce et la vertu de ceulz qui assailloient, ilz offrirent à rendre le chastel, leur corps et leur biens saufz. Mais les noz ne s’i vouldrent accorder et assailloient de fort en fort. Finablement l’issue du corps tant seulement si leur fu accordé, et que l’en les conduiroit par l’espace de
