en Flandres par certain traictié fait entre li et ceulz de Bruges et du pays du Franc, et fut une piece à Bruges, avant ce qu’il eust obeissance de ceuls de Gant et d’Ypre, et fist faire pluseurs justices en la dite ville de Bruges, de pluseurs qui ne vouloient estre en son obeissance. Et environ le Noël ensuyvant se mistrent ceuls d’Ypre en son obeissance[1].
Item, la semaine devant Pasques flouries, l’an dessus dit, fist monseigneur Jehan, ainsné filz du roy de France, duc de Normandie, l’acort entre la contesse de Flandres[2], femme du conte qui fu mort à Crécy et mere de celi qui estoit pour le temps appeliez Loys, et de la contesse de Bouloingne[3] qui avoit esté femme de monseigneur Phelippe de Bourgoigne, filz du duc de Bourgoigne et de la suer de ladite contesse de Flandres, sur ce que ladite contesse vouloit avoir le bail des enfans dudit monseigneur Phelippe et de la contesse de Bouloingne, quant à la conté d’Artoys qui appartenoit ausdiz enfans. Et aussi fist l’acort de pluseurs autres descors que les dessusdite contesses avoient ensemble ; et furent ces accors faiz à Sens[4]. Et en ycelle sepmaine là mourut Heudes duc de Bourgoigne[5], frere de la royne de France, qui estoit venuz à ladite ville de Sens pour ledit traictié.
- ↑ Sur tous les événements qui survinrent alors en Flandre, voir Gilles le Muisit, éd. Lemaître, p. 200 à 211. Cf. Kervyn de Lettenhove, Histoire de Flandre, t. III, p. 339 à 350.
- ↑ Marguerite.
- ↑ Jeanne de Boulogne.
- ↑ Sur cet accord conclu à Sens le 4 avril 1349, cf. E. Petit, Histoire des ducs de Bourgogne de la race capétienne, t. VIII, p. 60 à 62, et pièce justificative no 8538, p. 478 à 490.
- ↑ Eudes IV mourut à Sens le 3 avril 1349 (E. Petit, op. cit., t. VIII, p. 61).
