près de l’abbaïe où estoient logiez monseigneur Jehan de Bretaigne et la compaignie devant dicte qui mengoient et estoient à table. Et comme il leur fust dit que c’estoient les Escos qui venoient touz armés sus le roy d’Angleterre, à paine le pooient-il croire, ne vouloient. A la parfin quant il sorent ainsi qu’il estoit voir, il pristrent leurs armes et s’armerent, puis se mistrent noblement en conroy pour eulz deffendre et vouldrent garder i pas estroit afin que les Escos ne peussent avoir passage. Et comme de premiere venue il le deffendissent viguereusement et meissent à mort pluseurs Escoz, toute voies ne porent-il resister à la grant multitude qui estoit des Escoz ; mais il convint qu’il se rendissent, ou autrement eulz et toute leur compaignie eussent esté occis et mis à mort.
Quant le roi d’Angleterre oy dire que les Escoz venoient si asprement, si fu moult troublé en cuer, car il n’avoit avec li que trop pou de gent ; et pour ce, neccessité le contraint de li departir tost et ysnelment ; si s’en parti tantost, et la royne avec sa gent s’adresça vers i chastel très fort assis sus une roche qui joint à la mer[1], et se mist ilec à garant. Un pou après la royne se doubta que elle ne fust assigiée des Escoz ou des Flamens ; si prist courage d’omme et se mist en mer où elle ot moult à souffrir et fu en moult de perilz li et sa gent, et tant que une des damoiselles y mourut et une autre enfanta d’enfant avant son terme. Toute voies, à l’aide de Dieu, elle arriva seurement au port d’Angleterre.
Après toutes ces choses il vint à la cognoissance du
- ↑ Le ms. fr. 10132, fol. 405, ajoute : « dont par où li Flamans vinnent en Escosse ».
