paignie Henri[1] frere dudit duc d’Osteriche. Encontre ceulz fu le roy de Boesme et ot la premiere bataille. Quant il furent assemblez, si ot trop grant estour et trop fort chapleis de une part et d’autre et merveilleux, tant que en la fin les Barbarins et les Sarrazins furent tuez et occis. Le roy de Boesme en raporta glorieuse victoire et une honnorable journée. Si fu pris en celle bataille Henri le frere du duc d’Osteriche. Le jour ensuivant qui fu le premier jour d’octembre, se combati le duc de Baviere encontre le duc d’Osteriche Fedric[2], lequel il prist avec plusseurs autres nobles barons et occist avec grant partie de sa gent ; le duc d’Osteriche et son frere Henri pris, Henri se delivra tantost de sa rençon ; il donna au roy de Boème pour sa raençon xim mars d’argent fin esprouvé et li restitua une terre laquelle le pere de ce Henri, c’est assavoir, Aubert, le roy des Romains, avoit osté par violence au roy de Boesme. En celle terre estoient xvi bonnes forteresces, que citez que chastiaux, bien fermées, avec plusseurs autres villes champestres qui ne sont pas mises ou nombre. Ceste terre reçut le roy de Boesme avec le nombre d’argent dessus dit de Henri frere le duc d’Osteriche, et puis le delivra de sa prison franchement. Mais non obstant la prise de Fedric duc d’Osteriche, Leopod son frere et ses autres freres ne cesserent de guerroier le duc de Baviere par plusseurs guerres et batailles continuelz ; si n’osta mie la prise du devant dit Fedric la guerre, mais agrega et acrut de jour en jour.
