ciez et embatuz arriere en la ville, par quoy noz gens furent encoragiez et s’approchierent plus près des portes. Ceulz de la ville apperçurent leurs anemis entalentez de eulz mal faire, issirent à greigneur nombre et quantité qu’il n’avoient fait devant ; et nostre gent françoise viguereusement les reçurent, si les enchacierent comme devant ; mais pour ce qu’il s’aprochierent trop près des portes, il furent seurpris et vaincus. En celle bataille fu occis le seigneur de Saint Florentin[1] et pluseurs autres nobles et non nobles, dont le conte de Valois, messire Charles, fu merveilleusement corroucié et irié, et fist drescier ses engins et ses perrieres, et assega la ville de toutes pars, et en telle maniere que ceulz de dedenz ne pooient bonnement issir ne entrer sanz grant peril de leurs corps et de leurs vies, car il faisoit geter à ses engins grosses pierres dedenz la ville qui quassoient les murs et abatoient et froissoient les maisons. Aussi avoit-il fait faire eschafaux qui joignoient aus murs, par quoy on se pooit combatre à ceulz dedenz main à main. Et quant ceulz de la ville se regarderent et virent en si grant peril comme de perdre corps et biens, il envoierent embassateurs pour traitier de pais, laquelle fu ordenée en telle maniere[2] : premierement la ville seroit rendue, et des habitans de la ville ceulz qui vouldroient estre encore souz la seigneurie du roy d’Angleterre,
- ↑ Outre Jean de Saint-Florentin, la Chronique parisienne anonyme, p. 95, § 133, apprend que moururent encore à ce siège : Robert VII, comte d’Auvergne et de Boulogne, Jean des Barres, maréchal de France, et Jean de Medontel, chevalier.
- ↑ La Réole se rendit le 22 septembre 1324 (De Bréquigny, op. cit., p. 668).
