Les Œuvres de François Rabelais (Éditions Marty-Laveaux)/Gargantua/Chroniques

Ajouter des liens
La bibliothèque libre.

⸿ Comment au temps du bon roy Artus il eſtoit vng treſexpert Nigromancien que on appelloit Merlin.


Tovs bons cheualliers et gentilz hommes vous debuez ſcauoir que au temps du bon roy Artus, il eſtoit vng grant philoſophe nomme Merlin, Lequel eſtoit expert en lart de nigromance plus que nul homme du monde. Lequel iamais ne ceſſa de ſecourir leſtat de nobleſſe, dont il merita par ces faictz eſtre appelle prince des nigromanciens. Ledict Merlin fiſt de grandes merueilles, lesquelles ſont fortes a croire a ceulx qui ne les ont veues. Merlin eſtoit du grant conſeil du roy Artus, et toutes les demandes quil faiſoit en la court dudit Roy, luy eſtoyent octroyees, fuſt pour luy ou pour aultres. Il guarentit le Roy et pluſieurs de ſes barons et gentilz hommes de grans perilz et dangiers. Il fiſt pluſieurs grans merueilles. Entre lesquelles il fiſt vne nauire de cinq cens tonneaulx qui alloit vagant ſur terre ainſi que vous en voyez ſur mer. Et pluſieurs aultres merueilles qui ſont trop prolixes a racompter comme vous verrez plus a plain.

⸿ Comment Merlin diſt au roy Artus que il auroit beaucoup daffaires contre ſes ennemys.


Apres pluſieurs merueilles faictes par Merlin, a la louenge & au prouſſit du roy Artus, Merlin dict. Treſchier et magnanime prince vueillez ſcauoir que vous aurez beaucoup daffaires contre voz ennemys. Parquoy ſil vous plaiſt ie y veulx remedier, puis que ſuis a voſtre ſeruice, car touſiours ny pourray eſtre, car ie ſeray trompe & detenu par femmes, mais ſoyez certain que tant que ſeray en mon liberal arbitre ie vous garderay de la main de voz ennemys. Atant parla le roy a Merlin et luy dict. Dea Merlin neſt il poſſible de euiter ce peril pour tout mon royaulme, non pas dict. Merlin pour tout le monde. Adonc dict le Roy que il fiſt ce que il luy plairoit, et quil neſpargne riens de ſon Royaulme. Alors Merlin mercia le roy de loffre quil luy faiſoit. Luy qui ſcauoit toutes choſes, C’eſt a ſcauoir le temps paſſe par ſes ars, et le temps a venir par le vouloir de dieu. Ledit Merlin print congie du bon Roy, & ſe fiſt porter a la plus haulte montaigne de orient, et porta vne ampolle du ſang de Lancelot quil auoit recueillie de ſes playes apres que il auoit tournoyé ou combatu contre aulcun cheuallier. Oultre plus porta la rongneure des ongles des doibs de la belle genieure eſpouſe du roy Artus, qui peſoyent l’eſtimation de .X. liures. Merlin eſtant à la montaigne ſur le hault dicelle fiſt vne enclume dacier groſſe comme vne tour, et les marteaulx conuenables iusques au nombre de troys, Lesquelz par ſes ars il fiſt que ilz frappoyent ſi impetueuſement ſur lenclume que il ſembloit que ſe fuſt fouldre qui deſcendiſt du ciel, et tout par compas.

⸿ Comment Merlin fiſt apporter les oſſemens de deux balleines pour faire le pere et la mere de Gargantua.


Incontinent que Merlin eut entendu les marteaulx, il fiſt apporter les oſſemens de vne balleine maſculine, & les arrouſa du ſang de ladiſte ampolle, & les miſt ſur lenclume, et en brief furent conſommez leſdictz oſſemens et mis en pouldre, & adonc par la challeur du ſoleil de lenclume & des marteaulx fut engendre le pere de Gargantua, moyennant ladicte pouldre. Apres Merlin fiſt apporter les os de vne balleine fumelle, et meſla les ſuſdictz ongles de la royne, puis miſt le tout ſur lenclume comme ia auoit faict. Et de icelle pouldre fut faicte la mere dudict gargantua.

⸿ Comment Merlin fiſt vne merueilleuſe iument pour porter le pere & la mere de Gargantua.


Apres que Merlin eut acheue ceſte merueilleuſe beſongne. Il neuſt pas ſi toſt pouſe la derniere pouldre pour faire la femme que il veiſt lhomme qui eſtoit de la groſſeur dune baleine, & de longueur a lequipollent comme doibt eſtre vng droict homme : ce voyant Merlin getta ſon ſort ſur luy, et le fiſt dormir iusques a neuf iours ausquelz neuf iours debuoit eſtre faicte la femme. Le prince Merlin voyant le geant endormy propoſa luy faire vne beſte pour le porter. Et pource regarda ca & la, et veit les relicques de vne iument que il print, & miſt ſus lenclume & en fiſt vne ſi grant iument & ſi puiſſante quelle pouoit bien porter les deux auſſi facillement que faict vng cheual de dix eſcus vng ſimple homme, & apres ce lenuoya paiſtre aual la montaigne.

⸿ Comment Merlin rompit les enchantemens[1].


Qvant Merlin eut faicte ceſte grande & merueilleuſe iument il rompit les enchantemens et apperceut que ſa femme eſtoit ia faicte de la grandeur de lhomme, & adonc ledict homme va regarder la femme diſant, que faictz tu la Galemelle, dict la femme, ie attens grant Goſier mon amy. Adonc Merlin ſe print a rire, & leurs dict que les parolles eſtoyent belles, et que il vouloit que ilz euſſent ainſi nom. Adonc aduiſerent ledict Merlin, & luy firent honneur comme a leur ſouuerain ſeigneur, puis Merlin leur fiſt grant chere, & leur dict. Allez aual ceſte montaigne & me admenez vne iument que y trouuerez.

⸿ Comment grant Goſier et Galemelle allerent querir la iument, & engendrerent Garganuta.


Adonc par le commandement de Merlin grant Goſier & Galemelle deſcendirent au bas de la montaigne pour aller querir la grant iument, grant Goſier qui fut le premier au bas de la montaigne regardoit venir Galemelle, & prenoit plaiſir à regarder lentredeux de ſes chauſes (car ilz eſtoyent tous nudz). Adonc que Galemelle fut deſcendue, il luy demanda quelle chauſſe elle auoit la. Adonc luy reſpond en eſlargiſſant ſes cuyſſes quelle auoit celle playe de nature, grant Goſier regardant la playe large et rouge comme le feu ſainct Anthoine, le membre luy dreſſa, lequel il auoit gros comme le ventre dune cacque de haren, & long a laduenant, il diſt à Galemelle que il eſtoit barbier, & que de ſon membre feroit eſprouuette pour ſauoir ſe la playe eſtoit parfonde, a laquelle playe il ne trouua nul fons toutesfoys ſi bien leur agrea le ieu que il engendrerent Gargantua, puis menerent la grant iument a Merlin, & Merlin leur diſt. Vous auez engendre vng filz qui fera grans faictz darmes, et donnera ſecours au roy Artus a lencontre de ſes ennemys, & pourtant vous le debuez bien traicter & nourrir, & le vous commande, et que faciez prouiſion de viures pour quant il ſera ne ſur terre. En oultre ie vous ditz que ie ne feray plus auecques vous, et vous commande ſur peine de me deſobeir que quant voſtre filz ſera en leage de ſept ans, que vous deux ladmenez a la court du roy Artus en la grant bretaigne, & que apportez aulcunes choſes de par deca pour manifeſter & monſtrer voſtre puiſſance. Adonc diſt grant Goſier Treſchier ſeigneur comme trouuerons nous le chemin, quant iamais nous ny fuſmes. Diſt Merlin vous trounerez la teſte de vouſtre iument vers occident, et la laiſſez aller, & elle vous conduyra bien ſans faillir. Et adonc Merlin print congie deulx, dont il demenerent ſi grant dueil que on les euſt bien entenduz de dix lieues, et plouroyent ſi tresfort que deux moulins enflent peu mouldre de leaue qui leurs ſortoit des yeulx.


Grant Gosier et Galemelle ſen vont à la chaſſe pour oblier lennuy quilz auoyent de Merlin, ou ilz trouuerent vne grande trouppe de cerfz, grant Goſier ſen alla apres, et en print vne douzaine des plus grans. Adonc regarda derriere luy, et ne voit point Galemelle, car elle nauoit point de couſtume de demourer derriere. Adonc chargea les douze beſtes a ſon col pour veoir ou elle eſtoit demouree. Quant il fut pres délie il aduiſa que elle eſtoit acouchee, & apperceaut que ceſtoit dung filz maſle. Adonc le nomma Gargantua (lequel eſt vng verbe grec) qui vault autant a dire : comme tu as vng beau filz. Adonc la mere diſt que elle vouloit que il euſt ainſi nom : et le pere fut dacord. Lors prindrent lenfant Gargantua chaſcun par vne main, & le menerent a la montaigne ou ilz faiſoyent leurs demourances. Aulcuns acteurs veullent dire que Gargantua fut totallement nourry de chairs en ſon enfance. Ie dis que non (ainſi que dit Morgain & pluſieurs aultres) car ſa mere pouoit bien porter a chaſcune de ſes mammelles cinquante pippes de laict. Le pere et la mere prenoyent plaiſir a le nourrir, car il leur faiſoit tout plain de petis paſſe temps : aulcunesfoys il ſe eſbatoit a getter des pierres du hault en bas de la montaigne comme font petis enfans : lesquelles neſtoyent point moindres de la peſanteur de troys tonneaulx de vin : et par foys ſen alloit eſbatre en la foreſt comme font petis iouuenceaulx : et quant il veoit aulcun oyſeau pour ſon plaiſir il leur gettoit quelque pierres : lesquelles pierres luy ſembloyent bien petites. Elles neſtoyent pas moins groſſes que deux meulles de moulin. Et ſi luy peſoyent moins en la main, que ne feroit vne demye noix en la main dung homme de maintenant.

⸿ Comment grant Goſier et Galemelle penſerent de leurs affaires pour aller chercher Merlin a la court du Roy Artus.


Grant Gosier aduiſe que leur filz eſt grant & bien nourry & que les ſept ans ſaprochent et que il fault quilz le menent a la court du Roy Artus ainſi que leur a dit Merlin a ſon departement. Lors ſen va grant Goſier dung coſte & ſa femme de lautre pourchaſſer des viures. Tant firent que en peu de temps quilz eurent aſſés pour faire leur voyage. Et les chargerent leſditz viures ſur la grant iument : qui eſtoit bien a leſtimation de cinq cens charges de pain & chairs freſche & ſalee. De vin ne faiſoyent point de prouiſion. Puis tournerent la grant iument la teſte vers les parties doccident : & donnerent a Gargantua vne verge pour la toucher : laquelle eſtoit comme vng grant mas de nauire. Au regard de grant Goſier & Galemelle ilz prindrent chaſcun vng grant rochier ſur leur teſte pour monſtrer leur puiſſance au roy artus quant ilz ſeroyent en ſon royaulme (ainſi que leur auoit conſeille Merlin a ſon departement) desquelz rochiers vous orrez parler plus a plain en lhyſtoire.

⸿ Comment ilz ſe miſdrent a chemin Et des foreſtz de champaigne.


Tant a faict grant Goſier et ſa compaignie quilz ſont arriuez a Romme, & de la ſont venuz en allemaigne, en ſouyce : Et au pays de Lorraine : et de la grant champaigne : ou il y auoit pour ce temps la de grans boys : & de celluy temps ſabbatoyent les grans ſoreſtz Car il failloit paſſer par dedans. Quant la grant iument fut dedans les foreſtz de champaigne les mouches ſe prindrent a la picquer au cul ladicte iument qui auoit la queue de deux cens braſſes. Et groſſe a laduenant : ſe print a eſmoucher : & alors vous euſſiez veu tomber ſes gros cheſnes menu comme greſle : & tant continua ladicte beſte que il ny demoura arbre debout que tout ne fuſt rue par terre : et autant en fiſt en la beaulce : car a preſent ny a nul boys : et ſont contrainctz les gens du pays de eulx chauffer de feurre ou de chaulme. Et Gargantua qui ſuyuoit ladicte iument : & ne la pouoit arreſter ſe miſt vng ecot de boys ou petit orteil qui peſoit plus de deux cens liures. Gargantua ſe trouua blece et ſe print a clocher en diſant a ſon pere & mere que il ſe vouloit repoſer. Alors ſen allerent au riuaige de la mer ou a preſent eſt le mont ſainct michel. Quant grant goſier & galemelle & Gargantua furent au riuaige de la mer ilz furent bien eſbahys de veoir tant deaue. Alors grant Goſier demanda le chemin pour aller en la grant bretaigne ou ſe tenoit le Roy artus : et on luy dict que il leur conuenoit paſſer la mer ſilz y vouloyent aller. Ce pendant Gargantua penſoit ſon petit orteil & y mettoit vne tante que neſtoit pas moins longue de troys toiſes & eſtoit ladicte tante le bout dung clochier dune petite parroiſſe qui eſtoit la aupres : duquel clochier il en auoit oſte la croiſee ou eſtoit le coq : car elle luy euſt faict mal a ſa playe a cauſe des croiſons : & ne miſt guieres la playe a eſtre guerie. Et notez que il failloit quatre cens aulnes de toille pour taire la bande dudit petit orteil ſauf demy quartier iuſtement Car il lauoit vng peu enfle a cauſe du mal quil y auoit eu parauant.



Alors que ſceurent les gens du pays que ilz eſtoyent au riuaige vous euſſiez tant veu venir de gens de toutes pars pour les veoir que ceſtoit vne choſe ineſtimable, dont entre toutes nations qui y vindrent, les bretons leur firent beaucoup de mal. Et deuez ſcauoir que ce quilz portoyent ſur leur teſtes ilz le mirent bas & les viures que portoit la grant iument ſur ſoy : puis lenuoyerent paiſtre parmy les landes : & comme bons meſnagiers ferrerent bien leur bagaige. Mais ne ſceurent ſi bien faire ne garder leur vitaille que en peu dheure vous neuſſiez veu ces Bretons a lentour de ces rochiers caches de peur que on ne les veiſt : & auecques grans couſteaulx lung couppoit vne grant piece de venaiſon, lautre vne groſſe piece de beuf : tant y vindrent de foys que grant goſier les apperceut. Lors iura que ſe ilz namendoyent ce que il luy auoyent deſrobe que ilz mangeroyent toutes les vaches de leur pays. Ce voyant les bretons ilz leur baillerent deux mille vaches pour recompenſe, ſans les veaulx qui ne furent pas du conte. Adonc grant goſier & Galemelle dirent que ilz garderoyent bien que plus ne feuſſent deſrobes par le moyen des deux rochiers, Et alors ledit grant goſier et Galemelle prindrent chaſcun le ſien ſur la teſte ainſi que les auoyent apportez dorient. Et puis ſe mirent en la mer diſant que quant ilz en auroyent affaire qui les pourroyent auſſi bien aller querir comme il les auoyent portez. Et quant grant goſier fut aſſés auant il miſt le lien ſur la riue de la mer lequel rochier a preſent eſt appelle le mont ſainct Michel. Et miſt ledit grant goſier la poincte contre mont : et le puis prouuer par pluſieurs micheletz. Et eſt ledit rochier treſbien garde de preſent au noble roy de France comme vrayes relicques precieuſes. Galemelle vouloit mettre le ſien contre mais grant Goſier dict quelle nen feroit riens & que il le failloit porter plus auant, penſant a luy meſmes que tel pourroit prendre lung qui ne prendroit pas lautre. Galemelle fiſt le commandement, & le porta plus loing. Et eſt ledit rochier de preſent appelle tombelaine. Apres ſen ſont retournes les deux perſonnaiges ou il ont trouue Gargantua qui ſe gardoit que les bretons ne beſongniſſent a ſa perte comme aultresfoys auoyent faict.

⸿ Comment le pere et la mere de Gargantua moururent dune fiebure et comment Gargantua emporta les cloches de noſtre dame de paris.


Apres que grant goſier & Galemelle furent venuz de porter les deux rochiers : il leur print vun fieure continue laquelle ſi tresfort les tourmenta que en brief ilz moururent par faulte dune purgation. Parquoy gargantua ſe cuyda deſeſperer car il ſe arracha les cheueux & ſe gratoit la teſte. Il frappoit du pie contre terre, il ſe detordoit les bras : ceſtoit merueille du dueil quil demenoit. Puis ſon dueil paſſa & luy ſouuint quil auoit ouy dire que Paris eſtoit la plus grant ville du monde il luy print enuie de y aller car il appetoit a veoir choſes nouuelles comme font ieunes gens. Lors il monta ſur ſa grant iument & ſe miſt a chemin, quant il fut pres il ſe miſt a pied & enuoya paiſtre la iument, puis va entrer en la ville et ſe alla aſſeoir ſur vne des tours de noſtre dame, mais les iambes luy pendoyent iusques en la riuiere de ſeine et regardoit les cloches de lune & puis de lautre & ſe print a branſler les deux qui ſont en la groſſe tour lesquelles ſont tenues les plus groſſes de France. Adonc vous euſſiez veu venir les pariſiens tous a la foule qui le regardoyent & ſe mocquoyent de ce que il eſtoit ſi grant. Lors penſa que il emporteroit ces deux cloches & que il les pendroit au col de ſa iument ainſi que il auoit veu des ſonnettes au col des mules. Adonc ſen part & les emporte, qui furent marris ce furent les pariſiens car de force ne falloit point vſer contre luy. Lors ſe mirent en conſeil, et fut dit que lon yroit le ſupplier que il les apportaſt et miſt en leurs places ou il les auoit prinſes et que il ſen allaſt ſans plus reuenir, et luy donnerent troys cens beufz & deux cens moutonſ pour ſon diſner ce que accorda Gargantua puis ſen alla ledit Gargantua ſur le riuaige de la mer dont il eſtoit venu & lors recommenſa ſon dueil : quant il ne veit point ſon pere et ſa mere la ou il les auoit laiſſez mors, car Merlin qui ſcauoit tout eſtoit venu pour le reconforter lequel les auoit faict enterrer. Ledit Melin vint a Gargantua & luy dict ne te deconforte plus pour la mort de ton pere & mere, car ie les ay faict enterrer en ce lieu la. Lors dict Gargantua qui eſtes vous qui ainſi parles, diſt Merlin ie ſuis celluy qui commanda a ton pere que il vint par deca pour te preſenter au Roy artus. Dea dict Gargantua eſſe vous qui auez nom Merlin ouy dict il & pourtant diſpoſe toy pour ten venir auec moy en la grant bretaigne ſeruir le Roy. Alors dict Gargantua, ſire Merlin ie ſuis a vous, ayes pitié du pouure orphelin, puis dict Merlin va querir ta iument et paſſerons la mer car il eſt heure de partir. Gargantua fiſt ſon commandement & amena ladicte iument pres du riuaige de la mer laquelle eut peur de ondes en forte que on leuſt ouye ronfler de dix lieux puis ſe print a ſaulter ruer et courir. Merlin voyant que Gargantua vouloit aller apres luy dict que il la laiſſaſt aller & quelle alloit en flandres et que ladicte iument eſtoit chaulde et pourroit eſtre couuerte de beaulx poulains dont les flamans auroyent de la raſſe & que vne aultrefoys la pourroit recouurer. Mais tant y fut ladicte iument quelle fiſt poulains & poulaines, pourtant ſaichez que de ycelle eſt venu le nom des grans iumens de Flandres.

⸿ Comment Merlin mena Gargantua en la grant bretaigne.


Apres la perte de la grant iument Merlin fiſt venir vne nue qui porta luy & Gargantua ſur le bort de la mer pres Londres. Lors diſt Merlin a Gargantua, tu matendras icy & ie iray vers le bon Roy artus lequel te fera grant chere, & te deliurera vng don qui moult te plaira. Et pourtant ne le refuſe de rien que il te commande, non feray ie diſt Gargantua, ie feray tout voſtre vouloir. Alors ſen va Merlin qui ſalua le Roy puis diſt, Treſpuiſſant prince iamaine vng perſonnaige en vouſtre pays lequel eſt aſſés puiſſant pour deſſaire & mettre affin tous voz ennemys filz eſtoyent aſſemblez en vng oſt : & plus de cent mille hommes darmes dauantaige. Dea diſt le Roy comment eſt il poſſible, moy qui ay tant de vaillans gens de guerre iay perdu deux batailles ceſte ſepmaine paſſee. Sire diſt Merlin a ceſte foys leur monſtrerez que il ne vous doibuent pas venir veoir de ſi pres. Adonc le Roy & les ſeigneurs & barons auec Merlin montent a cheual. Et tantoſt ont trouue Gargantua qui ſe promenoit dont le Roy et les barons furent fort eſmerueilles de ſa groſſeur & haulteur. Lors le roy le ſalua & Gargantua luy rendit ſon ſalut comme a tel prince appartenoit : et le Roy luy demanda ſon nom. Sire de ſon nom ne vous ſoucies car il eſt pour ſe deſſendre en guerre contre ſon homme. Et gargantua leur reſpondiſt que ſil y en auoit trente mil hommes que il ne luy feroyent riens : adonc luy diſt le Roy que ſil vouloit aller combatre contre les Gos & Magos lesquelz luy faiſoyent guerre que il labilleroit de liuree & luy bailleroit gaiges & bouche a court. Lors le mercia Gargantua & diſt que lon luy fiſt vne maſſe de fer de ſoixante piedz de long : & que par le bout elle feuſt groſſe comme le ventre de vne tine. Lors commanda le Roy que len cherchaſſe des fourgerons pour ce faire Au ſurplus le Roy luy diſt que ces Gos et Magos eſtoyent fors & puiſſans & que ilz eſtoyent armez de pierre de taille & que il en auoit vng qui eſtoit ſon priſonnier lequel luy faiſoyt peur quant il le regardoit. Lors diſt Gargantua. Sire vous plaiſt il que ie le voye : et le Roy diſt que ouy : & enuoya querir ledit priſonnier comme diſt eſt. Et quant Gargantua le veit diſt. Sire voulez vous que ſe priſonnier ne vous face plus peur. Lors diſt le Roy faictes ce que vous vouldres. Et ſouldain Gargantua print ledit priſonnier par le collet et le getta deuant tous les Barons ſi treſhault que lon ne le pouuoit veoir puis tomba tout mort auſſi froiſſe que ſi vne tour fuſt tombee ſur luy. Puis diſt Gargantua. Sire ne craignes rien plus ceſtuy icy car il ne vous fera plus de peur.



La maſſue fuſt tantoſt faicte par la ſcience de Merlin tel que il luy failloit et en brief fuſt amenee dedans vne grant charrette comme on faict vne piece dartillerie : et preſentee a Gargantua lequel la print bien legierement & iura deuant tous les aſſiſtens que iamais ne beuroit ne mengeroit que les Gos et Magos neuſſent tous ſentiz que peſoit la maſſe que il tenoit en ſa main. Adonc vint vng poſte par le commandement du Roy artus qui le mena au camp des Gos et Magos & les monſtra audit Gargantua : diſant voyla les traiſtres Gos et Magos qui nuyt et iour nous veulent deſtruire. Et tout ſoudain Gargantua ſe fourre en la bataille comme vng loup, en vng troupeau de brebiz frapant de ſa maſſue ſa et la criant viue le bon Roy artus : car ie vous monſtreray loffence que luy aues faicte. Les Gos et Magos voyant que il eſtoit pire que vng grant dyable pour eulx ne luy ſcauoyent que faire fors tendre le dos : et demandoyent mercy Mais il nauoit pitie de nulz quelz quilz feuſſent. Lors vint larmee du roy artus qui fiſt le pillaige. Et Gargantua retourna a Londres par deuers le roy, et Merlin leur conta le cas : dont le roy fut fort ioyeulx de ſes vertus. Lors commanda le Roy dreſſer les tables pour Gargantua : et commanda faire les feuz de ioye en la cite pour la victoire quil auoit contre ſes ennemys les Gos et Magos. Lors ſe aſſiſt Gargantua a table : & a eſte aſſis preſentement. Et pour entree de table luy fut ſeruy les iambons de quatre cens pourceaulx ſallez : ſans les andouilles et boudins : et dedans ſon potaige la chair de deux cens lieures : & quatre cens pains : dont vng chaſcun peſoit cinquante liures : & la chair de deux cens beufz gras : dont il auoit menge les trippes de lentree de table. Et ne doubtez pas que le tranchouer la ou on luy tranchoit ſa chair ne feuſt merueilleuſement bien grant : car il pouoit bien tenir deſſus ledit tranchouer la chair de troys ou de quatre beufz : & y auoit ſix hommes qui ne ceſſoyent de trancher la chair deſſus ledict tranchouer et mettre par quartiers : et chaſcun quartier de beuf ne luy montoit que vng morceau : Et quatre puiſſans hommes qui ſans ceſſer a chaſcun morceau quil mangeoit luy iectoyent chaſcun vne grande paleree de mouſtarde en la gorge : & pour la deſſerte luy ſeruent quatre tonnettes de pommes cuyttes : et beut dix tonneaulx de cidre a cauſe quil ne beuuoit point de vin[2].

⸿ Comment Gargantua fut habille de la liuree du Roy artus.


Apres que les tables furent leuees & que Gargantua euſt prins ſa refection legierement non pas comme font vng tas de gallans, mais en eſcoutant les belles parolles et honneſtes ieulx & deuiſes du Roy et des princes qui la aſſiſtoyent, e quoy il prenoit plus de plaiſir cent mille foys quil ne faiſoit a boyre ne a menger. Le roy voyant que graces eſtoyent rendues & acheuees de dire, il manda querir ſon grant maiſtre dhoſtel, et luy commanda que il fiſt faire les habillemens de liuree de Gargantua, & quil fuſt fourny de chemiſe & de tous aultres veſtemens. Lors diſt le maiſtre dhoſtel que ainſi ſeroit il faict, puis que il luy plaiſoit le commander. Puis fut leue par le commandement dudict grant maiſtre dhoſtel, huyt cens aulnes de toille pour faire vne chemiſe audict Gargantua, et cent pour faire les couſſons en ſorte de carreaulx, lesquelz ſont mis ſoubz les eſſelles.

⸿ Pour faire ſon pourpoint fut leue ſept cens aulnes de ſatin, moytie cramoyſi et moytie iaulne, et trente deux aulnes & demy quartier de velours vert pour faire la bordeure dudict pourpoint.

⸿ Pour faire des chauſſes audict Gargantua fut achapte deux cens aulnes deſcarlate, et troys quartiers & demy, cheux le drappier.

⸿ Pour faire le ſaye de liuree fut leue neuf cens aulnes & demy quartier, moytie rouge & iaulne.

⸿ Pour faire la bordure fut achapte .lxx. aulnes de velours cramoyſi : moytie rouge & moytie iaulne, ainſi comme eſt dict par deuant.

⸿ Pour faire le manteau fut leue quinze cens aulnes vng Cartier & demy de drap iuſtement.

⸿ Pour faire ſes ſouliers fut achapte chez les conroyeurs cinquante peaulx de vache & demye.

⸿ Pour faire les courroyes a les fermer fut achapte deux douzaines de peaulx de veau iuſtement.

⸿ Pour carreler leſdicts ſoulliers fut achapte cheux les taneux le cuyr de trente ſix beufz.

⸿ Pour faire ſon bonnet a la coquarde fut baille au bonnetier deux cens quintaux de laine deux liures et demye et vng quart iuſtement.

⸿ Son plumart peſoit bien cent troys liures vng quarteron & dauantaige.

⸿ Gargantua auoit vng ſignet dor en vng de ſes doys. Auquel auoit troys cens marcs dor, dix onces & deux deniers & demy & y auoit vng rubiz enchaſſe dedans ledict ſignet qui eſtoit merueilleuſement bien eſtime : & peſoit cent trente liures & demye.

⸿ Au regard de monteure quoy quon en dye, il reffuſa de en prendre a cauſe que il alloit bien a pied : car en trente pas il faiſoit autant de chemin que vng poſte euſt ſceu faire a quatre cheuauchees auecques vng bon cheual.

⸿ Comment Gargantua remercya Merlin a ſecret.


Apres que les habillemens furent paracheuez & que Gargantua ſe veit en ce point atourne & veſtu de ſes ſumpteulx habillemens il reſſembloit au paon qui faict la roue, car il miſt ſes deux mains ſur ces deux couſtez en la preſence du bon Roy artus et de tous les gentilz hommes & nobles barons & aſſiſtans de ſa court qui la eſtoyent preſens. Adonc ledict gargantua eſtant eſleue ſur ces deux piedz il ſe regarda dung fier couraige en faiſant deux ou troys tours de la teſte, puis diſt : bon faict croire le conſeil dung prudent & ſaige homme tel comme celluy de monſeigneur Merlin : car bien me diſt ce que ie voy maintenant quant il diſt que ne reffuſaſſe en rien le bon Roy artus, car pour vng ſimple ſeruice que luy ay faict dauoir deſtruytz & vaincuz les gos & magos : il ma tant ayme quil ma donne ces ſumptueux habitz : dont ie fuis fort tenu a luy. Lors diſt : le Roy artus a Merlin. Cher amy nous regardons gargantua qui eſt bien aiſe deſtre ne : & dit du bien de vous & de la court. Parquoy il me ſemble que il feroit bon que vous alliez vous monſtrer deuant luy veoir ſil fera ce que il dict : Puis diſt merlin. Sire il fera plus fort mille foys. Adonc Merlin ſen va deuant Gargantua. Et quant Gargantua apperceut Merlin il vint vers luy & le ſalua. Puis Merlin demanda quelle chere & comme il ſe portoit. Et gargantua qui eſtoit gay, reſpond que treſbien ſe portoit, et ſur ce il ſe print a rire ſi tresfort & de ſi grant affection : pour la gentilleſſe de ſa perſonne & de lamour que il auoit a Merlin & au roy Artus que on lentendoit rire de ſept lieues & demye. Apres diſt Gargantua. Seigneur Merlin, iamois homme neut autant de bien au monde comme ien ay par voſtre moyen, parquoy ie vous remercye.

⸿ Comment le Roy Artus enuoya ambaſſade aux holendoys et Irlandoys.


Vovs debuez ſcauoir quant vng grant mal ou mauluaiſe fortune aduient a aulcun prince grant ſeigneur ou aultre pour vne il en aduient dix. Ainſi fut il au Roy Artus quant il eut guerre contre les Gos & Magos, car les Holendoys & Irlendoys qui luy eſtoyent tributaires ſe reuolterent, et quant le roy Artus leur mandoit querir ſes deniers ou ayde & confort de genſdarmes, ilz faiſoyent du contraire. Parquoy luy voyant ſon bon conſeil & la puiſſance de Gargantua, conclud leur enuoyer ambaſſade & ſignifier quilz luy euſſent a rendre le tribut de cinq annees, et mettre leurs villes & chaſteaulx entre ſes mains, & que leur roy le vint rendre priſonnier a ſa court pour en faire iuſtice telle que de raiſon : Les Irlandoys & Holendoys ouirent lambaſſade, de laquelle ne ſe firent que mocquer, & dirent que ilz eſtoyent deux nations, & que ilz ſe tiendroyent ſi fors que le roy de la grant bretaigne ne leur feroit riens, et deſſendirent aux ambaſſadeurs de non plus parler du roy Artus ſur peine de tenir priſon.

⸿ Comment les ambaſſadeurs firent leur rapport, & de la preparation de guerre.


Les ambaſſadeurs du roy Artus voyant la folle reſponce des Irlandoys & Holendoys ſe lont mis ſur mer pour tirer vers Londres ou eſtoit le roy Artus. Ilz ont eu bon vent, et ont fort bien exploite, tant quilz y arriuerent par vng lundy matin, & le Roy en ſceut les nouuelles, lequel les manda incontinant venir par deuers luy en ia chambre. Quant ilz furent entrez ilz le ſaluerent comme ilz ſcauoyent bien faire. Le Roy leur rendit leur ſalut, en leur demandant quelles nouuelles ilz apportoyent. Lors reſpondirent les ambaſſadeurs que les Irlandoys & Holendoys totallement eſtoyent ſes ennemys, et que ilz ne priſoyent riens ſa puiſſance. Le roy leur demanda, leur auez vous parle de la puiſſance de Gargantua, & ilz reſpondirent que non, combien que il leur en ſouuenoit aſſés, mais a cauſe de leur oultrecuydance ne les auons vouluz aduertir de leur prouſſit. Le roy leur diſt que c’eſtoit bien faict, & ces parolles finees le roy fiſt aſſembler ſon conſeil pour deliberer de la guerre, auquel fut appelle Merlin, et pluſieurs aultres : et fut conclud que Gargantua prendroit genſdarmes ce que il luy plairoit ſoubz ſon enſeigne : et que Merlin les conduyroit & bailleroit conſeil a Gargantua ainſi que il auoit de couſtume.

⸿ Comment Merlin compta a Gargantua que il luy falloit faire la guerre contre les Irlandoys et Holendoys.


Voyant Merlin la concluſion du conſeil du bon roy Artus comme celluy qui veult le proſſit de ſon maiſtre, il ſen eſt venu a Gargantua, et luy a dit. Gargantua leuez la main & faictes ſerment au Roy de le ſeruir en certaine guerre mouuee entre luy & les Irlandoys & holendoys. Lors gargantua qui eſtoit du coſte deuers le ſoleil qui eſtoit chault et penetrant, va leuer la main tout au large en ſorte quelle faiſoit demye lieue & demy quart dombre tout a la ronde iuſtement : & eſtoit le ſoleil ſur le point de midy, & quant Gargantua eut faict le ſerment, il pria Merlin que il luy donnaſt conſeil : & que de force auoit aſſés : & que en brief il luy monſtreroit louuraige que il ſcauoit faire de ſa maſſue : puis luy diſt Merlin : gargantua il te fault mener auecques toy deux mille hommes ſeullement : qui feront le pillaige quant tu auras gaigne la bataille : et ſaiches que tu prendras leur roy priſonnier, lequel tu admeneras au Roy artus, & les plus apparens de ſa court, et les detiens priſonniers iusques a ce quon en ait faict preſent au bon roy artus. Lors diſt gargantua, comment paſſerons nous la mer. Puis diſt merlin. Ie vous paſſeray en vng tel nauire au nous paſſaſmes a venir de la petite bretaigne en la grande. Et brief fut aſſemblee larmee et enuoyee ſur le port de la mer. Puis Merlin fiſt venir vne groſſe nuee noire, & en vng mouuement furent tous paſſés la haulte mer : & ſe trouuerent tous ceulx de larmee, ſauf Merlin qui ſen retourna a la court du Roy artus. Adonc quant gargantua veit ſes gens pres de luy il ne fut point eſbahy : mais leur diſt, mes enfans attendez moy icy en ce lieu : car ie veulx aller veoir ſi les portes de ceſte ville ſont bien fermees : & ſcauoir comme elle ſappelle : car nous ſommes en pays de conqueſte. Adonc Gargantua print ſa maſſue ſur ſon eſpaulle. Et ſen va vers la ville ou il rencontra vng homme arme, lequel vouloit monter a cheual, et luy diſt, A qui es tu, et qui eſt ton maiſtre. Adonc lhomme arme fiſt le ſigne de la croix en diſant, Ennemy ie te coniure. Lors gargantua le print & le miſt en vng coing de ſa gibeſſiere : et ſen alla vers les portes dicelle ville ou il trouua beaucoup de menu peuple, dont il ne tint conte, & les laiſſa courir en la ville & fermerent les portes & ſonnerent les cloches pour aſſembler toute la commune : laquelle fut incontinent ſur les murailles pour getter des pierres contre Gargantua : mais riens ne les doubtoit : & deuant tous ſe alla aſſeoir ſur lung des boulleuers de la ville : & leur demanda comme auoit nom la ville, & a qui elle eſtoit. Lors luy dirent que elle eſtoit au Roy dirlande, et quelle ſappelloit Rebourſin. Adonc demanda gargantua ſi leur roy eſtoit en la ville : et ilz dirent que ouy : et adonc Gargantua leur diſt que ilz luy allaſſent dire que il lattendoit luy & toute ſa puiſſance pour le combatte & mener priſonnier au Roy Artus.

⸿ Comment le Roy Dirlande & Holende ſortit[3] cinq cens hommes darmes pour combatre Gargantua.


Ainsi que Gargantua parloit aux citoyens : le roy dirlande ſortit par vne faulce porte ſecrette auecques cinq cens hommes bien armez, et vindrent pour aſſaillir gargantua qui eſtoit aſſis ſur le bouleuart : & quant gargantua les veit venir a lencontre de luy il paſſa oultre la barriere dedans le bouleuart : & ſe print a ouurir la gueulle, en ſe mocquant de ſi peu de gens que ilz eſtoyent. Adonc chaſcun le regardoit & diſoyent que ceſtoit vng diable car il auoit la gueulle fendue de quatre braces. Puis chaſcun ſe print a tirer arballeſtes & arcs contre gargantua : & ſe voyant Gargantua ſort legierement du bouleuert : et ſans frapper aulcun coup de ſa maſſue les print a belles mains & en empliſt tout le fons de ces chauſſes. Et vne partie miſt en la fante de ces manches, puis ſen retourna vers ces gens qui lattendoyent au bort de la mer et leur bailla les priſonniers a garder dont ilz furent moult ioyeulx de la belle prinſe que auoit faict leur capitaine gargantua.

⸿ Comment gargantua demanda aux priſonniers ſi le Roy eſtoit en leur compagnie.


Qvant Gargantua fuſt venu de bailler leſcarmouche a la ville de rebourſin qui eſtoit la ville capitalle du royaulme & que il eut prins pluſieurs priſonniers il les apporta en la fante de ces manches & au fons de ces chauſſes & les fiſt compter par ces genſdarmes & ſen trouua au nombre de troys cens[4] & neuf & vng qui eſtoit mort du vent dunt pet que auoit faict Gargantua en ces chauſſes & auoit le pouure priſonnier la teſte toute fendue & la ceruelle eſpandue de ce coup de broudier car il petoit ſi rudement que du vent qui ſortoit de ſon corps il en faiſoit verſer troys charretees de foing & dune veſſe en faiſoit mouldre quatre molins a vent. Or laiſſons ſe pet & lhomme mort & reuenons au troys cens & neuf qui furent contes & interrogues en ceſte maniere par gargantua. Or ſa mes priſonniers ſi vous voulez ſauluer voſtre vie diſtes moy en general ſi voſtre Roy eſt en voſtre compagnie. Adonc dirent tous en general que il ny eſtoit point : et quil eſtoit eſchappe par vne petite rue eſtroiſte & ceſtoit muſſe en vne petite maiſon baſſe en tirant vers la grant riuiere.

⸿ Comment Gargantua ſe diſpoſa de aller bailler lalarme en la ville de rebourſin : & des treſues qui furent faictes.


Lendemain au point du iour ſe diſpoſa Gargantua de bailler laſſault a la ville de Rebourſin plus fort que par deuant pour ſcauoir ſi le Roy ſortiroit comme il auoit ia faict la premiere foys, il commanda a ſes gens que ilz gardiſſent bien les priſonniers, & print ſa maſſue a ſon col & ſen alla acouder ſur les murailles de la ville de rebourſin. Quant les aſſiſtans le veirent venir ilz lallerent dire au roy : lequel luy enuoya vng meſſaige pour luy dire quil luy pleuſt de luy bailler treſues quinze iours : & quil luy feroit deliurer de la ville deux nauires chargees de haranc frays : & deux cens cacques de macquereaulx ſallez & la mouſtarde pour les manger : a quoy ſe accorda Gargantua, par ainſi que le roy prepareroit ſon armee dedans les quinze iours et que luy meſmes aſſiſteroit au combat auec toute ſa puiſſance lequel appointement ſut ainſi conclud & preſente audict gargantua les deux nauires chargees de harenc frays et les deux cens cacques de macquereaulx ſallez et .XX. barilles plaines de mouſtarde. Se voyant Gargantua que il eſtoit bien appoiſſonne il enuoya a ſes genſdarmes vne des nauires de haranc frays ſeullement auecques deux cacques de mouſtarde[5] & cecy luy fut ſeruy a ſa table deuant la porte de la ville a vng deſieuner par vng lundy matin entre ſept & huyt heures. Apres que gargantua eut deſieune il eut enuye de dormir & ſen alla a vng quart de lieue de la ville en vne vallee[6] ou il ſe coucha et ſe endormit. Aulcuns de la ville lauoyent veu endormy lesquelz en firent le raport : dont il fut dit par le conſeil que ilz le yroyent aſſaillir la nuyt et quilz le tueroyent endormy. Et quant ilz furent au lieu ilz cuidoyent deualler la vallee & ilz tumboyent dedans la gueulle de Gargantua qui dormoit la gueulle ouuerte : & y tumberent deux cens & cinq iuſtement. Et quant Gargantua fut eſueille il eut grant ſoif a cauſe de ces macquereaulx ſallez quil auoit menge : il alla a la riuiere pour boire & beut tellement quil miſt ladicte riuiere a ſec. Lors les citoyens qui eſtoyent tombez en ſa gueulle furent tous noyes.

⸿ Comment le Roy dirlande & hollende ſe prepara & aſſembla ſon oſt pour reſiſter contre gargantua.


Voyant le Roy Dirlande & Hollende que il nauoit gueres de treſues il fiſt diligence de mander par tout ſon pays de holende et de Irlande que tout ban et arriere ban fuſt preſt de venir a ſa bonne ville de Rebourſin le troyzieſme iour de May prochainement venant : et que chaſcun fuſt le mieulx en point pour ſe deſſendre quil ſeroit poſſible. Tant fiſt le Roy que en peu de temps il eut a la court deux cens mille hommes bien equippez de ce qui leur eſtoit neceſſaire pour le faict de la guerre. Et quant le Roy ſe veit ſi bien acompaigne et de ſi bons genldarmes & bien en point excepte de artillerie : car en celluy temps il nen eſtoit temps il nen eſtoit point, il manda par vng herault a Gargantua qui eſtoit auecques ces gens ſur le bort de la mer a faire grant chere que il vint a la champaigne & que le Roy lattendoit auec belle compagnie, et que ſil ne venoit bien toſt que il le viendroit veoir. Lors Gargantua fut bien aiſe, et diſt au herault que il ne print pas la peine et que il le verroit plus toſt que ne luy ſeroit beſoing, a tant ſe part le herault : puis diſt Gargantua a ces gens que quant il hucheroit que ilz vienſiſſent pour faire le pillaige. Lors ſen va Gargantua a larmee ſa groſſe maſſue ſur ſon col : et quant il fut pres il regarda que tout le pays eſtoit plain et auoyent faict des angins pour le faire tomber. Ce voyant il ſe approcha pres : & ilz luy tireroyent des fleches tant quil ne ſe veoit pas conduyre. Adonc print ſa maſſue a deux mains & ſe eſmouche deca et dela auſſi fermement que faict vng lyon quant il prent ſa proye, et en peu de temps il en tua cent mille deux cens et dix iuſtement : & vingt qui faiſoyent les mors ſoubz les aultres : et au millieu de larmee eſtoit le Roy & cinquante granſſeigneurs de ſa court qui crioyent miſericorde. Lors demanda Gargantua : Qui eſtes vous, & ilz reſpondirent que ceſtoit le Roy & les barons du pays. A donc leur commanda Gargantua que ilz ne bougeaſſent & quil les liureroit priſonniers au Roy artus auecques les aultres pour en faire a ſa voulente. Lors Gargantua ſe print a ſiffler en paulme a ſes gens lesquelz eſtoyent au riuaige de la mer a troys petites lieues de la. Lors incontinent quilz ouyrent leur capitaine Gargantua qui ſiffloit en paulme ilz ſauancerent de aller vers luy : car ilz ſcauoyent bien que il les appelleroit pour faire le pillaige des gens qui eſtoyent mors : & quant ilz furent la & que ilz eurent bien tout pille, Gargantua print les cinquante priſonniers, & les miſt en vne dent creuſe quil auoit. En ladicte dent creuſe auoit vng ieu de paulme pour eſbatre leſditz priſonniers & miſt le Roy dedans ſa gibeſſiere : puis ſont venuz au riuaige de la mer la ou ilz ont trouue le ſeigneur Merlin qui les attendoit a venir. Lors Merlin fiſt ſes enchantemens comme il auoit de couſtume : et incontinant quilz furent faitz ilz furent tous tranſmis a la court du Roy artus, la ou Gargantua fiſt preſent au noble Roy artus des deſſuſdictz priſonniers Et eſtoyent preſens tous les barons de la court dudict Roy Artus qui furent moult ioyeulx, & luy faiſoyent grant honneur & grant reuerence, & priſoyent beaucoup la force & puiſſance de Gargantua.

⸿ Comment Gargantua miſt vng geant en ſa gibeſſiere.


Lors quant Gargantua & Merlin & toute larmee furent arriuez a la court du Roy Artus & liurez les priſonniers : le bruyt fut par toute la ville que il y auoit vng geant qui auoit douze[7] coudees de hault qui eſtoit pour ſouſtenir la partie des Gos & Magos. Lequel ou il paſſoit il deſtruyſoit tout le pays, & demandoit nouuelles de Gargantua diſant quil vouloit combatre contre luy & venger le meurtre quil auoit faict auſditz gos & magos : & en fut le bruyt ſi grant quil vint iusques aux oreilles de Gargantua : lequel fut bien ayſe de ouyr parler de ſa puiſſance : & diſt que ſi ledit geant vouloit ſeruir le Roy artus que il luy bailleroit la moytie de ſes gaiges que il auoit du Roy Artus. Lors Gargantua print ſa maſſue & ien va veoir ou eſtoit le geant qui neſtoit que a cinq petites lieues de Londres ou il auoit aſſiege vng chaſteau & auoit ia tout deſtruyt le villaige. Adonc quant Gargantua le veit il le ſalua, & ledict geant le regarda & luy diſt : ceſt toy que ie cherche, iamois tu ne retourneras dont tu viens : mais maintenant ſeront venges les gos & magos. Adonc le geant qui auoit la veue baſſe print vne groſſe maſſue de boys & cuydoit frapper Gargantua : & il frappa vng gros cheſne. Alors gargantua le va prendre & luy plia les rains en la forme & maniere que lon plieroit vne douzaine deſguillettes & le miſt en ſa gibeſſiere & porta tout mort a la court du Roy artus.

⸿ Et ainſi veſquit Gargantua au ſeruice du Roy Artus leſpace de deux cens ans troys moys & .iiii. iours iuſtement. Puis fut porte en faierie par gain la phee, & Meluſine, auecques pluſieurs aultres lesquelz y ſont de preſent[8].

FINIS.
⸿ Senſuyt la table de ceſte preſente hyſtoire
Et cronicque de Gargantua.
⸿ Et premierement.

⸿ Comment Merlin fut appelle prince des nigromanciens a cauſe des grans merueilles quil faiſoit.

⸿ Comment Merlin demanda congie daller en orient pour faire grant Goſier & Galemelle qui eſtoyent le pere & la mere de Gargantua.

⸿ Comment Merlin fiſt la grant iument pour porter le pere & la mere de Gargantua.

⸿ Comment grant Goſier & Galemelle engendrerent Gargantua : & de l’enfance dudict Gargantua.

⸿ Comment grant goſier & galemelle & gargantua furent chercher Merlin : & comment la grant

iument abatit les foreſtz de champaigne & de la beaulce en ſoy eſmouchant de ſa queue.

⸿ Comment gargantua & ſon pere & ſa mere arriuerent au port de la mer pres le mont Sainct michel & le meſchief que leur firent les bretons.

⸿ Comment les bretons baillerent a gargantua a ſon pere & a ſa mere graut nombre de vaches & veaulx pour le larcin quilz leur auoyent faict.

⸿ Comment le pere & la mere de gargantua

porterent le mont ſainct Michel & tombelaine ou ilz ſont de preſent.

⸿ Comment le pere & la mere de gargantua moururent : & du dueil que fiſt le pauure gargantua.

⸿ Comment gargantua ſen alla a Paris pour paſſer ſon dueil.

⸿ Comment il print les deux cloches de noſtre

dame de Paris pour les pendre au col de ſa grant iument.

⸿ Comment les Pariſiens le prierent quil les remiſt en leurs places ou ellez ſont de preſent ce que fiſt ledict gargantua moyennant le deſieuner quilz luy firent.

⸿ Comment gargantua ſen retourna au mont ſainct Michel & comment Merlin ſapparut a luy

& l’emmena a la court du Roy Artus pour ſeruir ledict Roy.

⸿ Comment gargantua deſſiſt les gos & Magos de ſa maſſue. Et comment ledit gargantua fiſt ſon premier repas a la court du roy Artus, & fut ſeruy de pluſieurs metz, & de ſes abillemens de liuree.

⸿ Comment gargantua fiſt guerre aux Hollendoys et Irlandoys, & comment ilz luy baillerent deux nauires plaines de haranc frays & troys barricques de macquereaulx ſallez pour ſon deſieuner pour auoir treſues. Et comment il ſendormit la bouche ouuerte : & tomba troys cens des citoyens en ſa gueulle.

⸿ Comment il gaigna la bataille & miſt le Roy en ſa gibeſſiere, & vn grant nombre de grans ſeigneurs quil miſt en priſon en ſa dent creuſe.

⸿ Comment gargantua retourna à la court du roy artus & luy fiſt preſent des priſonniers & du Roy de Hollende & de Irlande.

⸿ Comment gargantua alla combatre contre vng geant. Et comment lediſt gargantua luy pleia les rains & le miſt en ſa gibeſſiere.

⸿ Cy finiſſent les Cronicques du grant & puiſ-
ſant geant Gargantua, contenant ſa genealo-
gie, La grandeur & force de ſon corps. Auſ-
ſi les merueilleux faictz darmes quil
fiſt pour le noble Roy artus, Tant
contre les Gos & Magos, que
a lencontre du Roy Dirlan-
de & zelande Auecques
les merueilles de Mer-
lin. Nouuellement
Imprimees A
Lyon.
  1. ↑ Ici commence une lacune qui s’étend jusqu’aux mots en print vne douzaine (page 30, ligne 5) inclusivement. Cette lacune est produite par l’absence du feuillet Aiii. Il est probable que ce feuillet a été volontairement enlevé à cause du récit fort libre qu’il contient. Nous avons complété le texte à l’aide de l’édition sans date.
  2. ↑ I. Édition de 1533 :

    Et ne doubtez pas que le tranchouer la ou on luy tranchoit ſa chair ne fuſt merueilleuſement grant, car il pouoit bien tenir deſſus la chair de troys ou quatre beufz, & y auoit vingt hommes qui ne ceſſoyent de decouper la chair & la mettre par quarties ſeullement, Car dung beuf il nen faiſoit que quatre petits morceaulx, et ne oſoit pas les faire plus gros pour cauſe quil ſe vouloit monſtrer honneſte a table. Et maſchoit les os comme on faict communement les os des alouettes. Oultre plus il y auoit quatre puiſſans hommes qui auoyent chaſcun vne pelle, et chaſcun morceau quil prenoit ilz luy iettoyent vne palleree de mouſtarde en la gorge, et pour la deſſerte luy fut preſente quarente tounettes de pommes cuyttes, & beut cent tonneaux de godale, & trente & demy de citre a cauſe quil ne auoit point de vin.

  3. ↑ Sortit auec cinq cens hommes, dans l’édition sans date & dans celle de 1533.
  4. ↑ Mille, au lieu de cens, ici & huit lignes plus bas, dans l’édition de 1533.
  5. ↑ Il y a ici une lacune évidente, que M. Paul Lacroix a signalée, et qui est commune aux trois éditions connues des Cronicques ; il est probable qu’il manque une ligne entière & que le passage complet était ainsi conçu : auecques deux cacques de macquereaulx ſallez, & (ici un nombre que nous ne pouvons déterminer) barilles de mouſtarde.
  6. ↑ L’édition de 1533 présente, à partir de cet endroit, la variante suivante :

    En vne vallee, ou il ſendormit. Aulcuns de la ville en firent le raport, dont il fut dit par le conſeil que le Roy accompaigne de ceulx de la ville le yroyent tuer tout endormy. Et quant ilz furent au lieu ou gargantua dormoit, ilz cuidoyent deualler la vallee et ilz tomhoient dedans ſa gueulle, car il dormoit la gueulle ouuerte, et leur ſembloit de ſes dentz que c’eſtoyent les gros rochiers qui eſtoyent au long de la riuiere. En ſorte quil tomba dedans ſa gorge deux mille neuf cens quarante et troys hommes tous armez, la picque au poing. Et quant Gargantua fut eſueille il eut grand ſoif a cauſe de ces macquereaulx ſallez quil auoit mangé, & s’en alla a la riuiere pour boire, et beut tellement qu’il miſt ladicte riuiere a ſec. Alors mes poures citoyens qui eſtoyent tombez en ſa gueulle furent tous noyez, en cepte troys qui tomberent dedans ſa dent creuſe, lesquelz en tombant ſe recommanderent à dieu, en ayant foy et creance quil les pouoit ſauluer, et non aultre.

  7. ↑ Vingt et deux, dans l’édition de 1533.
  8. ↑ Ce dernier paragraphe est remplacé, dans l’édition de 1553, par la conclusion suivante :

    Quant le roy Artus ſceut la venue, il vint au deuant de luy acompaigne de ces barons & cheualiers & luy firent grant chere. Et le roy Artus luy diſt que ſil vouloit demourer auecques luy quil le feroit homme de bien. Lors Gargantua luy diſt quil le remercioit du bien quil luy preſentoit. Mais quil ſen vouloit retourner en ſon pays dont il eſtoit ne & que ſon pere & ſa mere eſtoyent mors. Lors le roy Artus fut bien dolant quant il veit quil failloit quil ſen allaſt. Nonobſtant il luy donna enuiron cinq cens mille nobles Dangleterre. Et luy diſt quil print tout ce quil vouldroit. Mais gargantua ne voulut point de ſes gens car il auoit peur de leur queue. Et ſen vint tout ſeul droit en Normandie & ſen alla droit en Auge, pour cauſe quil auoit ouy parler des citres dudit pays & vint à ſaincte Barbe en Auge ou il beut la valeur de mille cinq cens ponſons de citre car il les trouua bien doulx. Mais il ſen repentit bien apres Car le citre le commença a brouiller & bouillir par le ventre en ſorte & maniere quil ne ſcauoit quil debuoit faire ſinon ſe pourmener en ſe frotant le ventre. Et quant il fut à Bayeulx il fut force quil ſe deſtachaſt ſes chauſſes a la martingale. Et declicqua en ſorte & maniere quil couurit toute la ville de citre quil avoit beu en telle maniere que les rues ne ſont pas encores biennettes. Et pour ceſte cauſe on les appelle les foyreux de Bayeulx. Quant Gargantua eut faict ceſte purge ſen alla droit a Rouen ouquel lieu il beut bien cent cinquante cacques de biere, Et pour cauſe que la biere eſtoit en grand quantite dedans ſon ventre elle commenca a faire vne operation ny plus ny moins que auoit faict le ciſtre. Parquoy ſon poure petit ventre, eſtoit bien malade. Et fut contraint gargantua de deſtacher la martingalle, de ſes chauſſes. Et declicqua ſon poure broudier en telle maniere & ſi merueilleuſe impetuoſite quil fiſt vne petite riuiere laquelle on appelle encores de preſent robec. Et y voit on encores de merdya culis. Toutesfois Gargantua leur fiſt vng grant ſeruice. Car a cauſe quil auoit tant bu de ciſtre & de biere, la riuiere eſtoit bonne pour faire de biere. Et y a lon faict bonne biere eſpeſſe & mouſſante & a cauſe de la ſource de leau de ce broudier, quant Gargantua ſe ſentit ainſi mallade il ne ſcauoit que debuoit faire. Daultrepart ceulx de Rouen auoyent grant peur quil ne les noyaſt tous en ceſte maniere. Et y en eut vng qui ſaduiſa de luy dire en ceſte maniere. Monſieur vous eſtes en dangier de mort & vous & nous ſi vous ny mettez remede de bonne heure. Et comment diſt Gargantua. Seigneur diſt lautre pour cauſe que nauez pas accouſtume de boire de vin vous eſtes ainſi tourmente. Il vous fault aller a la Rochelle ou vous fault prendre du pain chault & le mettre tremper dedans du vin. Et puis le manger & boire plus de vin que vous pourrez & vous prometz que vous en trouuerez bien. Et comment diſt gargantua nauez vous point de vin. Certes non pas pour le preſent. Et puis meſſieurs de ceſte ville le guardent pour leur faire de rouſties de matin ilz ſont en dangier dauoir vne maladie en ceſte ville, a cauſe de la puanteur de voſtre mecine. Adonc le pours malade gargantua ſen alla droit a la Rochelle, Et ſen vint droict a la ville. Quant ceulx de la ville le veirent ilz eurent grant peur & luy vindrent au deuant & luy demanderent quil vouloit. Lors il leur diſt. Ie vous demande que me faciez apporter cinq cens pains tous chaulx peſans chaſcun vingt & ſix liures & quil ſoyent bien blancz, & roc les apportez icy en la place ou eſt le vin, Ou aultremcnt ie vous rompray a tous la teſte & rompray voſtre hable & voz murailles. Adonc ceulx de la ville luy reſpondirent. Monſieur voſtre commandement ſera faict incontinent. Adonc ſe mirent tous ceulx de la ville apres les vngs a beluter les aultres a chauffer le four les autres a paiſtrir. En ſorte & maniere qu’ilz firent bien deux mille & cinq cens pains car ilz auoyent peur que apres que Gargantua auoit mange ces cinq cens pains quil ne fut pas contant. Par ainſi ilz vindrent vers luy, & luy preſentorent ce quil auoit demande. Adonc Gargantua deſſonſa autant de tonneaulx plains de vin. Et en chaſcun tonneau miſt vn pain tout chault. Puis commença a vng bout & en print vng & vuyda & pain, & vin, dedans ſa gorge Puis aux aultres enſuyuant. Et en telle ſorte quil en beut cinq cens tonneaulx & aualla cinq cens pains ny plus ny moins que ſi vous auiez vne miche dvng denier dedans vne tace plaine de vin. Apres quil eut mange cette petite ſouppe il ſendormit aupres des aultres tonneaulx. Quant il fut endormy ilz le vindrent veoir a grande proceſſion ne ſembloit pas à le veoir que ce fuſt vng homme, mais ſembloit vng Rochier, il auoit la gueulle ouuerte & ſortoit vne fumee de ſa gorge en ſorte quil ſembloit dung gouffre. Et dormit ainſi quarante & quatre iours. Tandis quil eſtoit ainſi il arriua pluſieurs nauires, qui venoient pour auoir du vin du bled Entre lesquelles y en auoit vne de Bretons & lautre de Gaſcons, & ſen vindrent la pour veoir ce merueilleux homme. Et en virant & tournant au tour de luy ilz veirent ſa gibaſſiere & vont fouiller autour. Et mes gaſcons & mes bretons firent tant quil louurirent & entrerent dedans, ilz fouillerent tant quilz trouuerent en vng bourſeron bien cinq cens mille nobles Dangleterre, lesquelz le roy Artus luy auoit donnez a ſon departement & mes Bretons & mes Gaſcons ſaccorderent enſemble en ſorte que en vne nuit ilz luy vuiderent ſe bourſeron. Il y eut vng Gaſcon le plus habille de tous qui trouua vng bourſeron, ou il y auoit vne ſonnette dor laquelle peſoit cent & troys vingtz liures a la mode de Bretaigne laquelle Merlin luy auoit donnee Et conſulterent enſemble comment ilz lauroyent enſorte quilz deliberent de lauoir le lendemain au matin Et ſe trouuerent enſemble mes gaſcons & mes bretons, mais ilz furent bien trompez. Car Gargantua auoit ia dormy quarante & quatre iours & deux heures parquoy il ſeſueilla & les trouua en ſa gibeſſiere. Adonc luy tout endormy les print & les loya tous enſemble dedans ſa brayette pour ſcauoir pourquoy ilz eſtoyent la venuz. Et nettoient pas moins de cinq cens Bretons, & troys cens Gaſcons, Quant ilz ſe ſentirent ainſi enſerres ilz dirent lung a laultre que ilz eſtoyent tous mors car ilz ſentoyent lair de la biere & du ciſtre. Et en eut vng entre les aultres qui eſtoit de Thoulouſe qui diſt. Meſſieurs recommandons nous dieu lequel a ſouffert mort & paſſion pour tout lhumain lignaige. Et nous nous en trouuerons bien. Adoncques ſaccorderent a luy & firent leur priere a dieu quil les voulſiſt ſauluer de ceſte puantiſe, & leur donner grace de ſortir de ceſte brayete. Lors gargantua reguarda dedans ſon bourſeron & trouua quil ny auoit que le nie, & que on auoit deſrobe ſes nobles Dangleterre, dont il fut bien dolant. Adonc il les tira hors de ſa brayette, & en trouua deux qui eſtoyent eſtoufez aupres du veſnier & eſtoyent deca mors quant les aultres ſe recommanderent a dieu. Lors gargantua leur diſt. Si vous ne menſeignez mon treſor que vous mauez deſrobe ie vous deſſeray tous. Lors diſt ce Tholouzan Monſieur il eſt vray que nous ſommes icy arriuez deux nauires vne de bretons & vne de gaſcons. Et cuydions que fuſſiez mort. Parquoy nous nous ſommes ſongnez a la reſte pardonnez nous comme vous voulez a dieu vous pardonne & nous vous rendrons tout. Et voulons eſtre a voſtre ſeruice & aller partout ou vous vouldrez fuſt ce en enfer. Adonc Gargantua ſaduiſa quilz luy ſeroyent bons pour porter a ſon pays. Et quilz chercheroyent les biens de ſon pere, lors il leur diſt. Allez moy querir mes nobles & viſte. Adonc ſenallerent a grant ioye querir leur butin. Et le apporterent a Gargantua. Lors il diſt quil ſen vouloit aller en ſon pays & quil ſe trouuoit de ſa medecine, & diſt a meſſieurs de la ville quilz apportaſſent mille pains pour ſa prouiſion lesquelz luy furent incontinent donnez & print mille ponſons de vin & miſt tout en ſa gibaſſiere & les cinq cens bretons il les miſt en vng bourſeron de ſa gibaſſſiere, & les troys cens gaſcons dedans vng aultre. Et ainſi ſen alla dela la Rochelle Et chemina tant par mer quil arriua cinq lieues par dela toutes les grandes mers & apperceut vne montaigne la plus grande qui fut ne ſera iamois veue. Lors ſe penſa que ceſtoit ou ſon pere auoit eſte faict, & ou il auoit eſte ne. Adonc il print terre & veit le pays beau & fructueux. Adonc il laiſſa aller ſes priſonniers pour chercher au tour des rochiers, & firent tant quilz trouuerent vne groſſe cite laquelle eſtoit en vne valee entre deux montaignes lors ilz ſen retournerent a Gargantua lequel ſe repoſoit pour cauſe qui eſtoit las dauoir tant chemine, & dauoir ainſi charge ſa gibeſſiere Adonc ilz luy dirent les nouuelles dequoy il fut bien ioyeulx & leur diſt, Meſſieurs ie vous feray tous riches faiſons grant chere de ce que nous auuons. Adonc ilz ſe commencerent a refaire de ſes bons vins auecques force iambons, que ces gaſcons auoyent apportez & beurent & mangerent ſi bien quil ne leur reſta guieres de leur pain ne de leur vin. Puis gargantua leur diſt. Meſſieurs ie men voys a la ville pour veoir quelz gens ſe ſont. Tenez vous vng peu a leſcart auecques voz arbaleſtes & ſil eſchappe quelque vng ne luy faillez pas, nous le ferons tenez vous en ſeur. Adonc gargantua ſen alla droit a la ville & va veoir de loing vne grant conmpaignie de geans haulx de vingt & cinq couldees, de groſſeur a laduenant. Et eſtoyent la venuz de tout le pays pour faire hommaige a la fille de leur roy lequel auoit eſte tue & mange par les tartarins & canibales lesquelz auoyent tout gaſte le pays. Lors gargantua vint vers eulx ayant vng arbre ſur ſon col qui auoit bien cinq cens pas de long, & leur va dire dieu vous guart mes beaulx enfans. Aqui eſtes vous certes diſt lung nomme molandin nous ſommes a Badebec fille du roy mioland. Lequel a eſte tue en bataille par les canibales, & tartarins, lesquelz viennent icy plus de troys cens mille enſemble & viennent deux foys lan. Gros paillardz diſt gargantua auez vous laiſſe aller ceulx qui ont tue voſtre maiſtre. Foy que ie doibs a mon dieu ie vous en feray repentir. Adonc il leua ſa maſſue & en donna ſi grant coup a lung deux quil le miſt tout en pieces. Adonc le capitaine nomme Boute fort, ſeſcria ſi hault que lon lentendit de toute la ville. Lors ceulx de la ville ſe mirent tous en armes & les geans vindrent les premiers lesquelz eſtoyent cinq mille troys cens vingt & vng. Adonc gargantua fut ſaige & bien entendu & ſe retira vng peu arriere pour les faire courir apres luy, lors vint Bouteſort leur capitaine cuydant que il ſe deuſt venger de gargantua mais il fut bien trompe. Car Gargantua ſe retourna tout court, & de ſa groſſe maſſe donna ſi grant coup a Bouteſort quil le fiſt auſſi froiſſe que ſi vne meulle de moulin tumboit ſur vng petit oyſeau. Puis vint ſur les aultres, & fiſt telle tuerie quil nen reſta que cent qui prindrent la fuitte au loing dvne roche, & cheminerent par deſſus mes gaſcons & ne leur ſeruit riens leurs arbaleſtes. Quant ceulx de la ville veirent ceſte groſſe deſconſiture ilz eurent grant peur. Et dirent quil valoit mieulx ſe rendre a luy que de ſe faire ainſi tuer. Lors ilz vindrent vers luy luy preſentant les clefz de la ville. Mais il n’en voulut point. Et diſt quil vouloit veoir badebec fille du roy Mioland. Adonc ilz le menerent au chaſteau ou elle eſtoit. Quant Badebec ſe veit elle eut grant peur, & ſen voulut fuyr mais gargantua luy diſt qu’elle neuſt nulle peur. Et quil luy vouloit faire tout ſeruice. Non obſtant que ceſtoit icy le pays, dont ie ſuis ne ie veulx que vous demeurez royne. Et ſi eſt de voſtre plaiſir vous ſerez ma femme. Et ie deliureray ce pays des caniballes & des tartarins. Adoncques Badebec & tous ceulx de la ville furent bien ioyeulx Dauoir vng tel champion pour les deſſendre. Adoncques fut faict feſte par la ville en ſi grant ioye que oncques nen fut veue de pareille. Et faiſoit moult beau veoir gargantua & Badebec enſemble Car elle auoit bien vingt & neuf couldees de huaulteur. Elle nauoit la gorge ouuerte que dvne braſſe & lu faiſoit moult beau veoir rire. Gargantua veſquit cinq cens & vng an, & eut de groſſes guerres, desquelles ie me tays pour le preſent. Et eut vng filz de Badebec ſon eſpouſe lequel a faict autant de vaillances que Gargantua. Et le pourrez veoir par la vraye Chronicque laquelle eſt vne petite partie imprimee. Et quelque iour que meſſieurs de ſainc Victor vouldront on prendra la coppie de la reſte des faictz de Gargantua, & de ſon filz Pantagruel.

Récupérée de « https://fr.wikisource.org/w/index.php?title=Les_Œuvres_de_François_Rabelais_(Éditions_Marty-Laveaux)/Gargantua/Chroniques&oldid=13776634 »