Les Œuvres de François Rabelais (Éditions Marty-Laveaux)/LeQuartLivre/32
Continuation des contenences de Quareſmeprenant.
Chapitre XXXII.
as admirable en nature, diſt Xenomanes continuant, eſt veoir & entendre l’eſtat de Quareſmeprenant. S’il crachoit, c’eſtoient panerees de Chardonnette.
S’il mouchoit, c’eſtoient Anguillettes ſallees.
S’il pleuroit, c’eſtoient Canars à la dodine.
S’il trembloit, c’eſtoient grands patez de Lieure.
S’il ſuoit, c’eſtoient Moulues au beurre frays.
S’il rottoit, c’eſtoient huytres en eſcalle.
S’il eſternuoit, c’eſtoient pleins barilz de Mouſtarde.
S’il touſſoit, c’eſtoient boytes de Coudignac.
S’il ſanglouttoit, c’eſtoit denrées de Creſſon.
S’il baiſloit, c’eſtoient potees de poys pillez.
S’il ſouſpiroit, c’eſtoient langues de bœuf fumees.
S’il ſubloit, c’eſtoient hottes de Cinges verds.
S’il ronfloit, c’eſtoient iadaulx de febues frezes.[1]
S’il rechinoit, c’eſtoient pieds de Porc auſou.
S’il parloit, c’eſtoit gros bureau d’Auuergne : tant s’en failloit que feuſt ſaye cramoiſie[2], de laquelle vouloit Pariſatis eſtre les parolles tiſſues de ceulx qui parloient à ſon filz Cyrus roy des Perſes.
S’il ſouffloit, c’eſtoient troncs pour les Indulgences.
S’il guygnoit des œilz, c’eſtoient guauffres & Obelies.
S’il grondoit, c’eſtoient Chats de Mars.
S’il dodelinoit de la teſte, c’eſtoient charrettes ferrees.
S’il faiſoit la moue, c’eſtoient baſtons rompuz.
S’il marmonnoit, c’eſtoient ieuz de la Bazoche.
S’il trepignoit, c’eſtoient reſpitz & quinquenelles.
S’il reculloit, c’eſtoient Coquecigrues de Mer.
S’il bauoit, c’eſtoient fours à ban.
S’il eſtoit enroué, c’eſtoient entrees de Moresques.
S’il petoit, c’eſtoient houzeaulx de vache brune.
S’il veſnoit, c’eſtoient botines de cordouan.
S’il ſe gratoit, c’eſtoient ordonnances nouuelles.
S’il chantoit, c’eſtoient poys en guouſſe.
S’il fiantoit, c’eſtoient potirons & Morilles.
S’il buffoit, c’eſtoient choux à l’huille. alias Caules amb’olif.
S’il diſcouroit, c’eſtoient neiges d’Antan.
S’il ſe ſoucioit, c’eſtoit des rez & des tonduz.
Si rien donnoit, autant en auoit le brodeur.
S’il ſongeoit, c’eſtoient vitz volans & rampans contre vne muraille.
S’il reſuoit, c’eſtoient papiers rantiers.
Cas eſtrange. Trauailloit rien ne faiſant : rien ne faiſoit trauaillant. Corybantioit[* 1] dormant : dormoit corybantiant les œilz ouuers comme font les Lieures de Champaigne, craignant quelque camiſade d’Andouilles ſes antiques ennemies. Rioit en mordant, mordoit en riant. Rien ne mangeoit ieuſnant : ieuſnoit rien ne mengeant. Grignotoit par ſoubſon : beuuoit par imagination. Se baignoit deſſus les haulx clochez, ſe ſeichoit dedans les eſtangs & riuieres. Peſchoit en l’air, & y prenoit Eſcreuiſſes decumanes[* 2]. Chaſſoit on profond de la mer, & y trouuoit Ibices, Stamboucqs, & Chamoys. De toutes Corneilles prinſes en Tapinois ordinairement poſchoit les œilz. Rien ne craignoit que ſon vmbre, & le cris des gras cheureaulx. Battoit certains iours le paué. Se iouoyt es cordes des ceincts[3]. De ſon poing faiſoit vn maillet. Eſcriuoit ſus parchemin velu auecques ſon gros guallimart Prognoſtications & Almanachz.
Voyla le guallant, diſt frere Ian. C’eſt mon home. C’eſt celuy que ie cherche. Ie luy voys mander vn cartel. Voyla, diſt Pantagruel, vne eſtrange & monſtrueuſe membreure d’home. Vous me reduiſez en contenence de Amodunt & Diſcordance. Quelle forme demanda frere Ian, auoient ilz ? Ie n’en ouy iamais parler. Dieu me le pardoient. Ie vous en diray, reſpondit Pantagruel, ce que i’en ay leu parmy les Apologues antiques[4]. Phyſis (c’eſt nature) en ſa premiere portee enfanta Beaulté & Harmonie ſans copulation charnelle : comme de ſoy meſmes eſt grandement ſeconde & fertile. Antiphyſie, laquelle de tout temps eſt partie aduerſe de Nature, incontinent eut enuie ſus ceſtuy tant beau & honorable enfantement : & au rebours enfanta Amodunt & Diſcordance par copulation de Tellumon. Ilz auoient la teſte ſphærique & ronde entierement comme vn ballon : non doulcement comprimee des deux couſtez, comme eſt la norme humaine. Les aureilles auoient hault enleuees, grandes comme aureilles d’aſne : les œilz hors la teſte fichez ſus des os ſemblables aux talons, ſans ſoucilles, durs comme ſont ceulx des Cancres : les pieds ronds comme pelottes : les braz & mains tournez en arriere vers les eſpaules. Et cheminoient ſus leurs teſtes, continuellement faiſant la roue, cul ſus teſte, les pieds contremont. Et (comme vous ſçauez que es Cingeſſes ſemblent leurs petits Cinges plus beaulx que choſe du monde) Antiphyſie louoit, & s’efforçoit prouuer que la forme de ſes enfans plus belle eſtoit, & aduenente, que des enfans de Phyſis : diſant que ainſi auoir les pieds & teſte ſphæricques, & ainſi cheminer circulairement en rouant eſtoit la forme competente & perfaicte alleure retirante à quelque portion de diuinité : par laquelle les cieulx & toutes choſes eternelles ſont ainſi contournées. Auoir les pieds en l’air, la teſte en bas eſtoit imitation du createur de l’Vniuers : veu que les cheueulx ſont en l’home comme racines : les iambes comme rameaux. Car les arbres plus commodement ſont en terre fichees ſus leurs racines, que ne ſeroient ſus leurs rameaux. Par ceſte demonſtration alleguant que trop mieulx & plus aptement eſtoient ſes enfans comme vne arbre droicte, que ceulx de Phyſis : les quel eſtoient comme vne arbre renuerſee. Quant eſt des braz & des mains, prouuoit que plus raiſonnablement eſtoient tournez vers les eſpaules : par ce que ceſte partie de corps ne doibuoit eſtre ſans defenſes : attendu que le dauant eſtoit competentement muny par les dens. Des quelles la perſonne peut non ſeulement vſer en maſchant ſans l’ayde des mains : mais auſſi ſoy defendre contre les choſes nuiſantes. Ainſi par le temoignage & aſtipulation des beſtes brutes tiroit tous les folz & inſenſez en ſa ſentence, & eſtoit en admiration à toutes gens eceruelez & deſguarniz de bon iugement, & ſens commun. Depuys elle engendra les Matagotz, & Papelars : les Maniacles Piſtoletz : les Demoniacles Caluins impoſteurs de Geneue : les enraigez Putherbes Briſſaulx, Caphars, Chattemittes, Canibales : & aultres monſtres difformes & contrefaicts en deſpit de Nature.
- ↑ S’il ronfloit… « Carême-prenant ronfloit des fèves, comme quelques-uns soufflent des pois en dormant. » (Le Duchat)
- ↑ Saye cramoiſie. Voyez Plutarque, Apophtegmes.
- ↑ Se iouoyt es cordes des ceincts. Burgaud des Marets voit ici un jeu de mots entre les corps des saints, les reliques sur lesquelles on prêtait serment, et les « cordes des ceincts, » les cordes qui ceignaient les cordeliers
- ↑ Ce que i’en ay leu parmy les Apologues antiques. « On a juſqu’ici été fort en peine de ſavoir d’où pouvoit avoir été tiré l’Apologue de Phyſis & d’Antiphyſie. La découverte en étoit difficile par deux raiſons. L’une que tout moderne qu’eſt cet Apologue, Rabelais n’a pas laiſſé de le qualifier antique ; ce qui a fait qu’on l’a, mais très-inutilement cherché, dans les écrits des Anciens. L’autre que Cælius Calcagninus, qui l’a inventé, n’eſt pas un auteur qu’on liſe beaucoup. L’Apologue, dont il s’agit, ſe trouve pag. 622. de ſes œuvres imprimées in-fol. à Bâle 1544. Il eſt intitulé Gigantes & commence ainſi : « Natura, ut eſt per ſe ferax, primo partu Decorem, atque Harmoniam edidit, nulla opera viri adjuta. Antiphyſia vero, ſemper Natura ; adverſa, tam pulchrum fœtum protinus invidit, uiaque Tellumonis amplexu, duo ex adverſo monſtra peperit, Admoduntem ac Diſcrepantiam nomine… » & le reſte que Rabelais n’a fait que traduire juſqu’à ces mots excluſivement : Depuis elle engendra les matagots, &c. (La Monnoye, Ménagiana, t. I, p. 371)