Les Œuvres de François Rabelais (Éditions Marty-Laveaux)/LeQuartLivre/38

Rabelais

Les Œuvres de François Rabelais (Éditions Marty-Laveaux) (1552)

Alphonse Lemerre, 1870 (Tome II, p. 404-405).

Comment Andouilles ne ſont à meſpriſer entre les
humains.

Chapitre XXXVIII.

Vovs truphez icy, Beuueurs, & ne croyez que ainſi ſoit en verité comme ie vous raconte. Ie ne ſçaurois que vous en faire. Croyez le ſi voulez : ſi ne voulez, allez y veoir. Mais ie ſçay bien ce que ie veidz. Ce feut en l’iſle Farouche. Ie la vous nomme. Et vous reduiſez à memoire la force des Geans antiques, les quelz entreprindrent le hault mons Pelion impoſer ſur Oſſé, & l’vmbrageux Olympe auecques Oſſé enuelopper, pour combattre les dieux, & du ciel les deniger. Ce n’eſtoit force vulgaire ne mediocre. Iceulx toutesfoys n’eſtoient que Andouilles pour la moitié du corps, ou Serpens que ie ne mente. Le ſerpens qui tua Eue, eſtoit andouillicque, ce nonobſtant eſt de luy eſcript, qu’il eſtoit fin & cauteleux ſus tous aultres animans. Auſſi ſont Andouilles. Encores maintient on en certaines Academies que ce tentateur eſtoit l’andouille nommee Ithyphalle, en laquelle feut iadis transformé le bon meſſer Priapus grand tentateur des femmes par les paradis en Grec, ce ſont Iardins en François. Les Souiſſes peuple maintenant hardy & belliqueux, que ſçauons nous ſi iadis eſtoient Saulciſſes ? ie n’en vouldroys pas mettre le doigt on feu. Les Himantopodes peuple en Æthiopie bien inſigne ſont Andouilles ſcelon la deſcription de Pline^[1], non autre choſe. Si ces diſcours ne ſatisfont à l’incredulité de vos ſeigneuries, preſentement (i’entends apres boyre) viſitez Luſignan, Partenay, Vouant, Meruant, & Ponzauges en Poictou. Là trouuerrez teſmoings vieulx de renom & de la bonne forge, les quelz vous iureront ſus le braz ſainct Rigomé, que Melluſine leur premiere fondatrice auoit corps fœminin iusques aux bourſauitz, & que le reſte en bas eſtoit andouille ſerpentine, ou bien ſerpent andouillicque^[2]. Elle toutesfoys auoit alleure braues & guallantes : les quelles encore auiourd’huy ſont imitées par les Bretons balaldins danſans leurs trioriz fredonnizez. Quelle feut la cauſe pourquoy Erichthonius premier inuenta les coches^[3], Lectieres, & charriotz ? C’eſtoit parce que Vulcan l’auoit engendré auecques iambes de Andouilles : pour lesquelles cacher mieulx aima aller en lectiere que à cheual. Car encores de ſon temps ne eſtoient Andouilles en reputation. La nymphe Scythicque Ora^[4] auoit pareillement le corps my party en femme & en Andouille. Elle toutesfoys tant ſembla belle à Iuppiter, qu’il coucha auecques elle & en eut vn beau filz nommé Colaxes. Ceſſez pourtant icy plus vous trupher, & croyez qu’il n’eſt rien ſi vray^[5] que l’Euangile.

---

1. Scelon la deſcription de Pline. « Himantipodes loripcdes quidam, quibus serpendo ingredi natura est. » (Liv. V, c. 8)
2. Serpent andouillicque. « Comment elle s’enuolla en forme d’vn ſerpent du chaſteau de Luſignan. » (Jean d’Arras, Hiſtoire de Meluſine)
3. Erichthonius premier inuenta les coches.

   Primus Erichthonius currus et quatuor ausus
   Jungere equos, rapidusque rotis insistera victor.

   (Virgile, Géorgiques, III, 113)

   Servius, dans un commentaire sur ces vers, indique le motif qui avait guidé l’inventeur.

4. La nymphe Scythicque Ora.

   Proxima Bisaltæ regio, ductorque Colaxes
   Sanguis et ipse Deum, Scythicis quem Jupiter cris
   Progenuit, viridem Myracen Tibisenaquc juxta
   Ostia, semifero (dignum si credere) captus
   Corpore, nec nymphœ gemiiios exhorruit angues.
   ..............
   Insuper auratos conlegerat ipse dracones
   Matris Orae specimen…

   (Valerias Flaccus, Argonautiques, VI, 48)
5. Croyez qu’il n’eſt rien ſi vray. Je pense qu’il y a ici une suspension comique qui devrait être marquée par des points. Rabelais semble dire d’abord qu’il n’eſt rien ſi vray… (que les récits qu’il vient de faire), puis il ajoute : que l’Euangile.