Car cil doit bien la chose perdre
Qui folemant la let aerdre.
Atant Brifaus vient en maison ;
Sa feme lou met à raison,
Si li demande des deniers :
« Suer, » fait il, « va à ces greniers ;
Si pren do blé et si lo vent,
Se tu viaus avoir de l’argent,
Car certes jo n’en aport gote !
— Non, » fait ele, « la male goute
Te puist hui cest jor acorer !
— Suer, ce me doiz tu bien orer,
Et faire encor honte graignor.
— Ha ! par la crois au Sauveor,
Qu’est donc la toille devenue ?
— Certes, » fait il, « je l’ai perdue.
— Si com tu as mençonge dite !
Te preigne male mort soubite.
Brifaut, vos l’avez brifaudée,
Car fust or la langue eschaudée
Et la gorge par où passerent
Li morsel qui si chier costerent ;
Bien vos en devroit en devorer.
— Suer, si me puist Morz acorer,
Et si me doint Dieus male honte,
Se ce n’est voirs que je vos conte. »
Maintenant Morz celui acore,
Et sa feme en ot pis encore,
Que ele enraja tote vive.
Cil fu tost mors ; mais la chaitive
Page:Montaiglon - Recueil général et complet des fabliaux des 13e et 14e siècles, tome IV.djvu/162
Le texte de cette page a été corrigé et est conforme au fac-similé.
152
82
fabliau ciii
