Toute plaine sa lanche l’abati mort sovin,
Puis escrie s’ensenge : « Chevalier, ferés i ! »
Loeys point et broche, li fiex le roi Charlon,
Vait ferir en l’escu Oedon le Borgengon,
Desor la boucle d’or li peçoie et confont,
Et l’auberc de son dos li desmaille et desront
Que trés par mi le cors li met fer et pingon,
Toute plaine sa lance l’abat mort de l’arçon.
Molt en pessa son frere Garin de Monloon,
Et va ferir le roi en l’escu a lion,
Que lui et le ceval abati en .i. mont.
Loeys saut en piés, trait le branc de color
Et leva sor son cief son escu a lion ;
Cui il consieut a cop n’a de mort garison.
Atant evous Aiols a coi(n)te d’esperon :
Molt se fu bien armés dedens son pavellon,
Et sist sor Marchegai qui li cort de randon,
Et Jobers et Ylaires, tout .iii. sont conpaignon :
Il ne deseveroient por tout l’or de ces[t] mont ;
Ja secoront le roi, cui qu’en poist ne cui non.
Aiols vit son signor Loeys en la presse,
Que felon Borgengon molt durement apressent.
Il broche Marchegai, se li lasque le resne,
Et vait ferir Gerin en le targe novele,
Desor la boucle a or li fraint et escartele,
Et la bronge del dos li desmaille et dessere ;
El cors li met l’espiel entre les .ii. mameles,
Toute plaine sa lanche l’abati mort sor l’erbe :
Puis saisi le destrier par le doree resne,
Son signor le rendi, si desrompi la presse,
Et li rois i monta par son estrier senestre.
A icele parole li aube lor esclaire :
Mirabeus la pucele est remesse en .i. tertre,
