Comment naiſſent les procés, & comment
ilz viennent à perfection.
Chapitre XLII.
’est pourquoy (diſt Bridoye continuant) comme vous aultres meſſieurs, ie temporize attendant la maturité du procés, & ſa perfection en tous membres : ce ſont eſcriptures & ſacs. Arg. in l. ſi maior. C. commu. diui. & de conf. d. 1. c. Solennitates. & ibi gl. Vn procés à ſa naiſſance premiere me ſemble, comme à vous aultres meſſieurs, informe & imperfaict. Comme vn Ours naiſſant n’a pieds ne mains, peau, poil, ne teſte : ce n’eſt qu’vne piece de chair rude & informe. L’ourſe à force de leicher[1] la mect en perfection des membres, vt no. doct. ff. ad leg. Aquil. l. ii. in ſi. Ainſi voy ie, comme vous aultres meſſieurs, naiſtre les procés à leurs commencemens informes & ſans membres. Ilz n’ont qu’vne piece ou deux : c’eſt pour lors vne laide beſte. Mais lors qu’ilz ſont bien entaſſés, enchaſſés, & enſachez, on les peut vrayement dire membruz & formez. Car forma dat eſſe rei.[2] l. ſi is qui. ff. ad leg. falci. in c. cum dilecta extra de reſcrip. Barbatia conſil. 12.
- ↑ L’ourſe à force de leicher.
Il eſt temps deſormais que le juge ſe haſte :
N’a-t-il point aſſez leché l’Ours ? - ↑ Forma… rei. « La forme donne l’être à la chose. » Voy. ci-dessus, p. 257, la note sur la l. 22 de la p. 190.*
* Forma… ſubſtantia. « La forme changée, la substance est changée. » On voit que Bridoye a donné à son successeur Bridoison l’exemple du respect pour « la fo… orme. »
