Le Livre des ballades/Car France est cimetière aux Anglois
Le mandement par Prudence tranſmis
Aux trois Eſtats reſponce doit avoir.
Elle nous mande qu’avons des ennemis,
C’eſt très bien fait nous le faire aſſavoir.
Puiſqu’a tout mal ou voit Anglais mouvoir
Contre Françoys, par la foy qu’à Dieu doibz,
De reſiſter contr’eulx feray debvoir,
Car France eſt cimetiere aux Anglois,
Elle nous mande qu’ilz ne ſont endormis
A nous piller & rober noſtre avoir.
Et qu’ilz ne ſont trop lâches ni deſmis,
Et que de brief nous doibvent venir veoir,
C’eſt tres bien fait nous le ramentevoir
Devant qu’en France viengnent faire effrois,
A cette fin par bon ordre y pourvoir,
Car France eſt cimetière aux Anglois,
De tout bienfait Anglois ont cueur remis.
D’ainſi vouloir traïſon concepvoir,
Et pour ce faire ilz ont tous leurs arts mis ;
Mais qu’ilz ſe gardent François venir revoir,
Car ſi la mort y debvroys recepvoir ;
Ils comparront le mal fait aux Francoys.
Je leur conſeille non bouger ne mouvoir,
Car France eſt cimetiere aux Anglois.
Prince qu’on note que ſi debvoit pleuvoir
Pierres, cailloux, flourira blanche croix.
Ne taſchent plus Anglois nous decepvoir,
Car France eſt cimetiere aux Anglois.