Le Livre des ballades/Frere Lubin ne le peult faire
Pour courir en poſte à la ville
Vingt foys, cent foys, ne ſçay combien
Pour faire quelque choſe vile,
Frere Lubin le fera bien ;
Mais d’avoir honneſte entretien,
Ou mener vie ſalutaire,
C’eſt à faire à un bon chreſtien,
Frere Lubin ne le peult faire.
Pour mettre (comme un homme habile)
Le bien d’autruy avec le ſien,
Et vous laiſſer ſans croix ne pile,
Frere Lubin le fera bien :
On a beau dire je le tien,
Et le preſſer de ſatisfaire.
Jamais ne vous en rendra rien,
Frere Lubin ne le peult faire.
Pour desbaucher par un doulx ſtile
Quelque fille de bon maintien,
Point ne fault de vieille ſubtile,
Frere Lubin le fera bien.
Il preſche en bon theologien,
Mais pour boire de belle eau claire,
Faictes la boire à votre chien,
Frere Lubin ne le peult faire.
Pour faire plus toſt mal que bien,
Frere Lubin le fera bien ;
Et ſi c’eſt quelque bon affaire,
Frere Lubin ne le peult faire.