Le Livre des ballades/Mes amours durent en tout temps
Voulentiers en ce moys icy
La terre mue & renouvelle.
Maintz amoureux en font ainſi,
Subjectz à faire amour nouvelle
Par legiereté de cervelle,
Ou pour eſtre ailleurs plus contens ;
Ma façon d’aymer n’eſt pas telle,
Mes amours durent en tout temps.
N’y a ſi belle dame auſſi
De qui ſa beauté ne chancelle ;
Par temps, maladie ou ſoucy,
Laydeur les tire en ſa naſſelle ;
Mais rien ne peult enlaydir celle
Que ſervir ſans fin je pretens
Et pour ce qu’elle eſt touſiours belle,
Mes amours durent en tout temps.
Celle dont je dy tout cecy,
C’eſt Vertu, la nymphe eternelle,
Qui au mont d’honneur eſclercy
Tous les vrays amoureux appelle ;
« Venez amans, venez (dit-elle),
Venez à moi, je vous attens ;
Venez (ce dit la jouvencelle),
Mes amours durent en tout temps. »
Prince, fais amye immortelle ;
Et à la bien aimer entens.
Lors pourras dire ſans cautelle,
« Mes amours durent en tout temps. »