Le Livre des ballades/Il ne faict pas ce tour qui veult
Qui en amours veult eſtre heureux
Fault tenir train de ſeigneurie,
Eſtre prompt & adventureux,
Quant à monſtrer l’armaerie ;
Porter drap d’or, orphaverie
Car cela les Dames eſmeut.
Tout ſert : mais, par ſainte Marie,
Il ne faict pas ce tour qui veult.
Je fuz nagueres amoureux
De Dame en beaulté aſſouvie
Qui me diſt en motz ſavoureux,
Mon amour eſt en vous ravye ;
Mais il fault qu’el’ ſoit deſſervye
Par cinquante eſcuz d’or, s’on peult
Cinquante eſcuz bon gré ma vie !
Il ne faict pas ce tour qui veult.
Alors lui donnas, ſur les lieux
Où elle faiſoit l’endormie.
Quatre venues de cueur joyeux ;
Voire en moins d’une heure & demie ;
Lors me diſt à voix eſpamye.
Encor ung coup ; le cueur me deult.
Encor ung coup ! hélas ! mamye.
Il ne faict pas ce tour qui veut.
Prince, combien qu’on ait envie
D’engreſner, quand le moulin meult,
Si force & puiſſance devie
Il ne faict pas ce tour qui veut.