Le Livre des ballades/Que justice est des sainctz cieux procedée
Ô juſticiers qui miniſtrez juſtice,
Pas n’eſt requis d’eſtre faibles ne freſles
Quand vous devez corriger la malice
Des vicieux plains de toutes cautelles,
Ni eſtre auſſi trop ingrats ou rebelles ;
Pitié y doit auoir quelque regard ;
Vous eſtes ceulx à qui eſt demandée
Par les humains, & cognoiſſez par art,
Que Juſtice eſt des ſaincts cieux procedée
Soubz vos manteaulx doit repoſer police
Comme au temple repoſoient les pucelles ;
Car vous auez par les princes office
De reſpandre par tous ſes eſtincelles.
Eſpandez les ſur tous ceulx & ſur celles
Qui par larcin, tromperie & barat
L’ont chaſſée hors, pillée & gourmandée,
Car vous ſçavez, corrigeant tout eſtat
Que Juſtice eſt des ſainctz cieulx procedée.
N’eſt ſi ferré, connue on dit, qui ne gliſſe,
Ne ſi ſaiges qui n’ayent ſottes cervelles,
Si treſubtil qui ne face km tour nyce,
Ne ſi juſtes qui n’ayent faulſes querelles,
Mais getter fault d’auec ſoy choſes telles
Se poſſible eſt, & plus toſt que plus tard,
Ou de voz cueurs vertu eſt decedée,
Rememorans en public & à part
Que Juſtice eſt des ſainctz cieulx procédée.
Princes, ſaichez qui juſtice depart
Peine eternelle luy ſera euadée
Car ce n’eſt point menterie ou broquart
Que Juſtice eſt des ſainctz cieulx procedée.