Trop font chil chevalier le poure hault lever ;
Alons ce bas chemin pour le pourre eskiever
Et che quemin hierbu, qui est douls a passer.
Bien vous saray, je croy, et conduire et mener,
Tout seloncq che bosquet vous feray retourner. »
Et Flourence respond : « Che fait a creanter. »
Ung vert chemin ont pris sans point de larriester,
Tant le mena Millon, que Dieus puist craventer,
Qu’avoecques li la bielle fist ou bosquet entrer.
Puis le fist desvoiier et a diestre tourner ;
Flourence ne se sot si bien de li garder,
Quant entour lui ne vit siergant ne baceler,
Adont dist la puchielle a se vois hault et cler :
« Milles, que faittes vous ? Ou volés vous aler ?
Nous alons maisement, se Dieus me puist sauver ! »
Adont li dist Millons : « Tout che laissiés ester ;
Il vous fauldra par tamps d’autre martin canter. »
Lors a traitte l’espee et a pris a jurer
Que, s’il ot la puchielle un tout seul mot sonner,
Qu’en l’eure li volra dedens le corps boutter.
Quant Flourence l’oÿ, si a pris a plourer ;
Elle tira son frain, si cuida retourner.
Mais Milles li traïttres, qui estoit plains d’amer,
Dou plat de son espee va la bielle fraper,
Que sur l’archon devant fist son corps souviner ;
Par le rengne le prist et le fist tos passer.
De che bosquet alerent unne foriest trouver,
La s’embati Millon, que n’y volt ariester.
Et Flourence li crie, qui le viaire ot cler :
« Aÿ ! sire Million, trop vous voy meserrer
Encontre vostre frere, qui me doit espouser !
Conment oséz vous ce ne faire ne pensser ?
À Judas le felon vous doit on comparer
Ou a Kaïn, qui fist son frere Abiel finer. »
2391 la bielle et fist sont intervertis — 2412 meserez.
