Pour ce fist moult Flourence pener et travillier.
Souvent se meth em painne de la bielle baizier
Et de lui acoller et de li fiestoiier,
Mais moult fort se deffent et moult en fait dangier
Et li a dit : « Traïttrez, tout ce devés laissier,
Car ainschois me lairoie tous les membres trenchier
Que de vous me laissasse en tel cas atouchier.
Vous y poéz asséz et coursser et luittier,
Mais c’est tout pour noient, ne vous y a mestier. »
Adont le rassault Milles et prist a enbrachier ;
Chelle prent a criier et moult hault a noizier,
Et Milles le frappoit moult fort sans manechier.
Telle vie menerent jusques a l’esclairier,
Que li solaus a pris ens ou chiel a raiier ;
Dont ot Milles grant fain et si n’ot que mengier.
Or ot Millez grant fain, mais ne sot ou trouver
Viande ne maison ou il puist desjuner,
Car li foriestz fu grande, si n’oze hors aler,
Adfin c’on ne le puist congnoistre n’aviser.
Des chevaus descendirent, car ne polrent errer
Par my le dru dou bos, ou il voloit passer,
Adfin que nuls nel sieuce, siergant ne baceler.
La leur font les espines tous leurs draps desquirer,
En maint lieu les faisoient les espines sanner,
Leurs mains et leurs visagez forment esgratiner.
La conmencha Millon maudire et disputer,
Dieu et sa douche mere tenchier et despiter.
« Mauvais homs », dist Flourence, « c’or m’en laissiés aler !
Tes pequiés nous fera trestous deus affoler.
Aÿ ! astronomie, on ne te doit blasmer
Ne celui qui y scet ses raisons ordener :
- ↑ 2588 noize h. — 2592 nuls ne le — 2596 despiter.
2577 laissastez — 2580 a manque — 2581 Chielle
