Et Millez, vostre frere, qui l’en mena de chy. »
Lors ont dit Esmeret tout le fait qu’il basty
Et conment fist entendre qu’il l’avoit sans nul sy
Veü mort en l’estour et raporté pour li
Un aultre chevalier, que on ensevely
Ou non de lui meïsmes ; conment on y offry
Et conment li siens frerez demanda puissedi
Flourence, la puchielle au gent corps signoury,
Et conment l’apostolle sacré et beneÿ
Tramist son cardinal e se li deffendi
Dou mariage faire que il avoit basti.
Quant li bers Esmerés ceste parolle oÿ,
Il a dit a ses gens : « Mes freres m’a traÿ ! »
« Signeurs », dist Esmeréz, qui tant fist a prisier,
« Mes frerez m’a traÿ par mortel encombrier,
Car il a fait Flourence en ce bos desvoiier.
E las ! tresdouce amie, que j’ay grant destourbier !
Mes freres vous volra en ce bos fourvoiier.
Chiertes che poise moy ! » Lors prist a larmoyer,
Tel doeil prist a son coer bien cuida marvoiier ;
Agrevain et li aultre l’ont pris a apaisier.
« Signeur », dist Esmeréz, « il fault ce bos chierquier.
Qui me polra trouver Millon le lozengier,
Je li feray honneur et si tresbien paiier
Qu’a tous jours em polra ses amis avanchier. »
Dont sont yssus de Ronme maint gentil chevalier
Et maint riche bourgois et maint rice escuiier ;
Mais li yssue fu tout droit sus le nuittier,
Il sont entré ou bos, mais ne vault un denier.
Millez va toutte nuit, qui ne voelt atargier,
Car la scieute redoubte, qui estre poelt derier ;
- ↑ 2556 l. douce — 2559 coer manque — 2567 la n. — 2569 ne vault.
2549 vo d. — 2550 nous auiens b.
