Brandist s’espée et desplaie s’ensaigne,
Point le cheval, veit sey en la berganne,
Ung péan fiert moult tost sans demorangne,
L’escu luy perce et l’aubert luy mehaigne,
Mort le tribuche davant luy en la plaingne.
Sire estoit de Cordes une terre laintaigne.
Ung bon cheval [y] conquist Charlemaine ;
Yceul cheval sy avoit nom Corengne,
N’avoit meillour de cy en Allemaigne ;
Puis ot mestier au bon roy Charlemaine ; (fo 13 vo)
(Vous soupviengne ou fut grant la bergaigne
Contre Rolend qui fut mort en Espaigne :
Et aussi fut d’Olivier luy chadoine.
Humes perdeist Charles en la bergaigne !)
Quant le duc Nesmes a crié son ensaigne
Et les Bretons, nul n’y a qui se faigne,
De bien ferir sur celles gens ne craigne ;
Et l’arcevesque y fiert sans demoraine,
Qui des Bretons est maistre et chevetaigne.
Forment occit ces paens et mehaigne.
Fort se deffent Aiquin et sa compaigne.
FIer fut l’estor et mult grant la bataille !
Maint pié y ot coupé et maint entraille.
Onc en Bretaigne, ge vous le dy sans faille,