Page:Anonyme - Macaire, chanson de geste.djvu/201

62—88

9

Macaire.

Ez vos Macaire entrant ens el vergier ; (*)
Ensemble o lui avoit maint chevalier.
Et comença la dame à dosnoier.
« Dame, fait il, bien vos poés vanter
« Sor totes dames que on péust trover
« Nule plus bele ne péust on esmer ;
« Et ce est bien uns grans pechiés mortés
« Quant uns tés hom vos a à governer.
« Se je et vos fussiens acompaigné,
« Tel druerie ne péust on trover
« Por bien amer, acoler et baisier. »
La dame l’ot, si le vait esgarder
Et en riant si li prist à parler :
« Sire Macaires, tant estes preus et ber,
« Ceste parole que je vos oi conter
« Bien sai la dites par mon cors esprover. »
Et dist Macaires : « D’el vos covient penser ; (*)
« Que nen est, dame, deçà ne delà mer,
« Nus hom qui puist miex de nos vos amer,
« Et si n’est peine que péusse endurer
« Que nel fesisse por vo cors deliter. »
La dame l’ot que nel dit por gaber,
Or orrés ja com li respont arrier. (*)
Dist la roïne : « Tu ne sais mon penser ;
« Ains me lairoie tos les membres coper (*)
« Et en un feu et ardoir et bruisier,
« Et en après la poriere à venter,