Page:Anonyme - Macaire, chanson de geste.djvu/257

747—773

65

Macaire.

Qu’une fontaine encontre à un pendant,(*)
D’une forest et mervillose et grant.
La voit la dame, à covoiter la prent,
A Auberi si a dit en oiant : (*)
« Auberis sire, et vos pri et demant
« A la fontaine que me metiés devant.
« Tant sui lassée de boivre en ai talent. »
Dist Auberis : « Vos parlés saigement. »
A pié descent dou palefroi amblant,
Vient à la dame, en sa brace la prent,
Dou palefroi la descent maintenant,
Lez la fontaine mise l’a en séant.
La dame en boit qui en ot grant talent,
Les mains se lave et le vis ensement.
Puis le chief leve, si a gardé devant
Et voit Macaire venir esperonant,
Tot armé d’armes et d’autre garnement.
Quant l’a véu, ne fu mais si dolens ;
Moult durement à dementer se prent.
« Aubris, fait ele, il nos vait malement, (*)
« Que deçà vient li malvais soduians
« Par qui sui fors dou réaume des Francs. »
Dist Auberis : « Ne vos doté noient ;
« Bien vos serai à mon pooir garans. » (*)
Atant es vos le cuivert soduiant ;
Ad Auberi si a dit en oiant :
« Tu ne l’en pues mener por rien vivant ;