Et sainte Vierge, que li face secors.
En la grant selve, ens el maior herbor (*)(*)
Ele se fiche et à dol et à plor.
Et quant Macaires ot mort le vavasor,
Il se resgarde environ et entor ; (*)
Quant ne la trove, il en ot grant tristor,
De ce qu’ot fait si ot il grant dolor.
Auberi laisse gisant emmi l’herbor, (*)
Lez la fontaine dont vers est la colors ;
Arier s’en torne à cort l’emperéor.
Séu n’ert cuide de grant ne de menor.
Et la roïne s’en vait à grant paor
Parmi le bois demenant grant dolor.
Diex la conduie qui fait naistre la flor !
D’ele lairons trosqu’à un autre jor
Si com el bois endura grant langor.
Or est Aubris ens el prael versés,
Et ses levriers sor lui fu acostés.
Li palefrois paist l’herbe par le pré.
Trois jors i fu levriers sans mangier ;
El mont ne fu nus hom de mere nés
Qui son segnor ait onques miex ploré
