Es chevaus montent qui miex miex, à tenson, (*)
Et le chien sivent à force et à bandon.
Tant sont alé, n’i font demorison,(*)
Que au bois sont arivé de randon,
Dont flairors ist dou mort à grant fuison, (*)
Et le chien voient ester sor lui amont.
Quant l’ont véu, ariere trait se sont.
Parmi le pré esgardent environ,
Le palefroi d’Aubri conéu ont ;
Quant l’ont véu, en font grant plorison.(*)
Quant l’emperere se prent à esgarder,
Le palefroi d’Aubri conoist premier,
Et en après si conoist le levrier.
Chascuns comence hautement à crier :
« Hé ! gentis rois, ci a grant encombrier ! » (*)
Kalles apele duc Naimon de Baivier :
« Conseillés moi, je vos en voil proier. »
Et dist dus Naimes : « Ja ne se puet celer
« Que la joutice si a fait li levriers ;
« Cil que plus het en sait tot le mestier :
« Macaire faites de maintenant cobrer, (*)
« Que tot le voir vos en saura conter.
« Et à Paris ferons le cors porter
