Page:Anonyme - Macaire, chanson de geste.djvu/272

80

942—968

Macaire.

« E altament li faron enterer,
« De la justisie pois averon demander. »
Dist l’inperer : « Vu parlés como ber ;
« Ço qe vos plait non voio contraster. »
Adoncha fait Machario pier,
A soa jent ben le fait guarder.
Li corpo e fraido, nul homo li voit toçer ;
Erbe prendent oliose e cler,
Al meio qe il poit le fi à Paris porter,
Con gran honor le font enterer.
Do ! cun le plure peon e çivaler,
Dame e polçele e petit baçaler !
Quando fo seveli, li rois retorna arer
Et avec lui dux N. de Baiver.
Tota la jent començent à crier,
Pur de justisia prendent à roier.
E li rois se fait Macario amener.
« Machario, fait il, molto me poso merveler
« Quando eo t’oldo à tota jent acuser
« De la mort d’Albaris qe era pro e ber ;
« Droit al can te veço calonçer.
« Se tu as morto Albaris, qe est de ma muler
« Qe Albaris eo la dea mener
« En estranço païs por mon cor vençer ? »
Dist Macario : « Bon rois, lasez ester ;
« Queste parole à moi aderasner.
« Mais no le fi ne no l’avi enpenser ;