Page:Anonyme - Macaire, chanson de geste.djvu/273

942—968

81

Macaire.

« Et hautement le ferons enterrer,
« De la joutice puis vorrons demander. »
Dist l’emperere : « Vos parlés come ber ;
« Ce que vos plaist ne voil je contrester. »
Adont Macaire fait maintenant cobrer,
Et à sa gent si l’a fait bien garder.
Li cors est frois que nus n’i vait toucher ;
Herbes ont pris qui moult flairent souef,(*)
Au miex que poent l’ont à Paris porté,
A grant honor le font il enterrer.
Diex ! com le plorent péon et chevalier,
Dames, pucelles et petit bachelier !
Quant fu en terre, li rois retorne arier, (*)
Ensamble o lui dus Naimes de Baivier.
Tote la gent comencent à crier,
Por Dieu joutice se prenent à rover.
Et se fait Kalles Macaire amener,
Et si li dist : « Moult me puis merveiller
« A tote gent quant je t’oi demander(*)
« La mort Aubri qui tant ert preus et ber, (*)
« Et droit au chien te voi je encorper.
« S’Aubri as mort, que est de ma moillier
« Que li donnai à conduire et mener
« En terre estrange por nostre cors vengier ? »
Et dist Macaires : « Boins rois, laissiés ester ;
« Ceste parole me laissiés deraisnier.
« Mais ne le fi ne ne l’oi en pensé ;