« E quest’e ma muler qi m’est rer venu. »
Quant li oster li oit entendu,
El dist à sa muler qe ben soia servu
Quella dame, e ad asio metu.
E quella le fait, qe ben ovrea fu.
Ora fu la raine molto ben ostalé ;
De tuto ço qe li estoit à gré
Quelle dame li dono à sa volunté,
Por q’ela li pardona de gran bonté.
Quando la guarda por flans e pot costé,
Graveda la voit, si le pris piaté.
Ele l’ademande qe est quel malfé
Qe senpre porta quel gran bastun quaré,
Ait il nul seno o est desvé ?
Dist la raine : « Cosi e costumé.
« No la adastés ne no lo coroçe,
« Que de seno non est ben tenpré.
« Mon segnor est, in guarda m’oit mené. »
Diste le dame : « Soia à li honor de Dé !
« A nostro poer seri servi e honoré. »
A Varocher donent ço qe il oit comandé
Plu per paura ca per bona volunté.
