« Parilé est de tot otrier.
« E vestra fila si vos manda proier
« Qe no la deça par nula ren abandoner. »
Quant l’inperer li oldi si parler,
E de sa file la novela conter,
S’el oit dol non e da merviler.
Qui anbasaor qi li vene anonçer,
Altament elo le fe onorer,
E li rois d’Ongarie altament gracier.
Quant quela novela oldi quel inperaor
De soa file c’oit fresco li color,
A gran mervile n’avoit gran dolor,
Si qe por le non pote ester non plor.
Dist à li anbasaor : « Nu faren li milor,
« Qe eo prendero di me anbasor
« E por ma file mandero ad estor,
« Si me la faro venir à gran onor ;
« Mais non fala guera à K. l’inperaor
« Quan à ma file fato oit tel desenor. »
Adoncha li rois n’en volse far sejor ;
Fe apeler ses çilvaler mior.
