Uit en apele, tos del sien parentor,
Et si estoient des lor tote la flor.
« Seignor, fait il, or ne faites demor,
« Si m’alés querre ma fille Blancheflor,
« Que m’ot bannie Kalles l’emperéor
« De son réaume et de sa terre encor.
« Onques mais n’aie de l’empire l’honor
« Se ne li vent chier Blancheflor s’oissor
« Qu’il a chacie à si grant desonor,
« Quant venue est en si grant tenebror. »
Li emperere n’ot mie cuer d’enfant ;
Si fu dolens de sa fille au cors gent
Qu’onc plus ne fu en trestot son vivant.
Tant l’amoit il de cuer et léaument
N’est pas merveille se il en fu dolens.
Uit en apele de ses meillors parens,
Que por sa fille envoie en nef corant.(*)
As quatre mes qui li vinrent avant
De par le roi de Hongrie en present,
Grant honor fist, si dona vestemens (*)
Et à chascun un palefroi amblant,
