« Que itel choses ne font mie à loer
« Ne mi baron nel porroient durer. » (*)
Et dist Berars : « Bien li saurai noncer,
« Se Dex me doint en sa cité aler. »
Adonc s’aroute que n’i vout sojorner
Costantinoble tant que pot encontrer.
Le roi i trove o sa gentil moillier
Et son barnage, contes et chevaliers ;
Por une feste les ot fait asembler.
Huimais orrés dou cortois mesagier,
« Sire emperere, dist Berars, entendés :
« Kalles li rois, li mieudre coronés
« Qui soit el mont n’en la crestienté,
« M’a devers vos à mesagier mandé,
« Et dou mesage ne sui joians ne liés.
« Quant le saurés, s’en serés corrocés.
« Ja d’une rien vos vueil acréanter :(*)
« Nen fu mais dame qui corone ait el chief
« A cui nus ber tant honor ait porté
« Com à vo fille Kalles li rois membrés ;
« Mais ele a moult envers lui meserré, (*)
« Qu’avec un nain l’a trovée en pechié ;
