Page:Anonyme - Macaire, chanson de geste.djvu/365

2040—2066

173

Macaire.

« Qui vos ont fait mainte grant mesprison.
« Se nos assaut li rois, nos defendrons ;
« Il a le droit, et nos le tort avons.
« Diex en conseut qui sofri passion.
« Que je ne sai vos dire autre raison. »
Or lairons ci dou riche roi Kallon
Et de Berart et del bon duc Naimon ;
Si conterons dou roi qu’ot à roion(*)
Costantinoble entor et environ.
De soe fille ot au cuer grant friçon ;
Se ne la venge, ne se prise un boton.
Et quant li conte la soe mesprison,
Tel duel en ot par poi d’ire ne font.
Il en apele ses contes, ses barons.
« Segnor, fait il, oés la mesprison
« Que faite m’a l’emperere Kallon
« De moie fille à la clere façon.
« Chacie l’ot com on fait le larron.(*)
« Sore li mist et blasme et achoison ; (*)
« Se ne m’en venge, ne me prise un boton.
« Conseillés moi, segnor, quel la ferons. »
Tot primerains a parlé Florimons,
Et cil fu saiges et de bone raison.
En haut parole, ne sembla pas bricon :
« Drois emperere, por quoi le celerons ?
« Grans est ta terre et grant ta regions,
« Et vostre gent si est de grant renon ;