« Asés avés chevaliers et péons.
« Ores mandés l’emperéor Kallon
« Que vostre fille, Blancheflor au chief blont,
« Il vos envoit, que n’i quiere achoison,
« O se ce non, que nos le desfions. »
Dist l’emperere : « A Dieu benéiçon.
Après parole uns gentis chevaliers,
Saladin ot à non, moult fu prisiés.
En haut parole com hom preus et com ber :
« Sire emperere, li vostre chevalier
« Tot par droiture vos doivent conseiller,
« Ne por paor ne por nul encombrier
« Ne se doit on onques retraire arier.
« Or prenés un des vostres chevaliers
« Qui saiges soit de dire et de parler ;
« Par lui mandés à Kallon au vis fier
« Que vostre fille vos voille renvoier,
« Se ne la puet avoir ne recovrer,
« Que il vos doie por ele tant doner
« Com ele puet de tot en tot peser,
« Et cil avoirs soit de l’or le plus chier,
« De l’or d’Arage, qui plus fait à prisier. (*)
